Rond di 6 or di atardi riba 27 di juli Mireille Sint Jago a oficialisa su retiro como candidato for di partido Movimiento Electoral di Pueblo (MEP). Sra. Sint Jago a forma parti di e partido MEP pa 4 aña te cu e dia di awe.

Sra. Sint Jago ta expresa cu: “durante e cuater añanan cu mi tabata forma parti di e partido aki, y specialmente un siman pasa ora mi tabatin un encuentro personal cu lider di partido Evelyn Wever-Croes, mi a realisa cu no por a kita mi duda tocante si e partido MEP no ta respeta hende di color. Ni hende cu ta di afo cu ta bin pa comparti cu nos y ta contribui na nos isla. Adicionalmente durante e debate organisa pa ‘millennials’ tambe mi a haya e realisacion aki.”

Riba e anochi di debate politico organisa pa ‘millennials’ tabatin un tanda di preguntanan cu mester a wordo contesta simplemente cu un ‘si’ of un ‘no’. Ora a puntra si e partidonan ta sostene derechonan di igualdad pa parehanan LGBT, casi tur partido, incluyendo MEP a contesta cu un ‘no’. Esunnan cu a vota pa un ‘si’ tabata partidonan UPP, POR, RED y Raiz.

Sra. Sint Jago a bisa cu tur e puntonan aki a contribui na e realisacion cu sra. Wever-Croes no ta un persona cu e lo confia pa lidera e futuro generacionnan di Aruba. “Eleccion di 2017 mester ta un eleccion unda cu pueblo mester ta informa debidamente. Den e ultimo 4 añanan y prome cu esaki mi a percura pa mi duna pueblo e informacion corecto. Aworaki mi por bisa cu e no lo ta corecto pa mi ta riba lista aki. Mi no por sigui apoya un persona cu tin un porta hancho pa cierto hende di Aruba y un porta hopi smal pa otro hende. Specificamente si nos wak e stranheronan, Latino nan y hendenan cu ta bin di islanan Bonaire, Sint Maarten, Sint Eustacius y Saba, entre otro.”

Ora e ex candidato a wordo puntra desde ki momento e problema aki a cuminsa, el a splica cu: “Desde e momento cu mi a cuminsa cu e partido aki mi tabata pidiendo pa haya un encuentro personal cu lider di partido. Esaki mi no a haya te cu dia 20 di juli di 2017. Si bo ta lidera un pais no por ta asina cu bo ta trata cierto hende, manera ami, diferente.”

Un di e preguntanan cu a wordo haci na lider di partido di MEP ta: “kico ta e motibo pa aparentemente e cantidad di voto cu bo candidatonan genera no wordo considera suficiente pa e partido por sigui dilanti?” Sra. Sint Jago a confirma cu esaki ta un realidad den e partido. “Cualkier candidato cu genera menos cu 200 voto ta wordo acerca pa por traha espacio riba e lista pa otro hende por yena e espacio aki.” Pero esaki no ta cuadra cu otro practicanan, segun sra. Sint Jago. Tin 7 districto en total, y 39 espacio riba lista. Sra. Sint Jago ta splica cu personalmente e no ta haya cu ta klop cu na cierto momento a pone 3 candidato den districto di Noord, mientras cu a pone 9 candidato na districto di San Nicolas.

Sra. Sint Jago a conclui, “e ora ey mi a realisa cu partido MEP of Evelyn Wever-Croes no ta duna bo un chens pa ta exitoso si bo ta un hende di color”, mustrando su color di cuero.

Sra. Sint Jago a confirma cu na e momentonan aki e no ta interesa den bira candidato di otro partido.

Bon Dia Aruba a tuma contacto cu Evelyn Wever-Croes pa su reaccion pero a avisa nos pa warda pa e press release official.

Segun e relato di MEP: “Den preparacion pa e lista, partido a papia cu Mireille Sint Jago na varios ocasion. Nos preocupacion ta si e lo saca e cantidad di voto cu nos mester pa gana eleccion. Mireille a saca 77 votonan na nr 12 biaha pasa y su performance te ainda ta hopi pober.

“Locual si partido MEP ta lamenta ta cu Mireille a acusa Evelyn Wever-Croes y nos partido falsamente di ta discriminatorio. Si MEP tabata discrimina, lo nunca Mireille a haya un oportunidad riba lista, pero esey no ta e caso. Ademas, partido MEP tabata tin y tin mas hende di color riba nos lista.”