Abdalá Bucaram, ex-presidente di Ecuador y candidato den e eleccionnan proximo, a wordo deteni durante oranan di marduga di ayera diaranson den e caso di presunto vinculo cu delincuencia organisa, fuentenan oficial a informa.
“Marduga di awe mainta, Polis di Ecuador a detene e ciudadano Abdala Bucaram Ortiz y dos agente di transito di municipio di Quito. Nan lo keda na disposicion di husticia”, e minister di Gobierno, Maria Paula Romo a skirbi na su cuenta di Twitter.
Di otro banda, Fiscalia General di estado a señala cu e ex-presidente Ecuatoriano (1996-1997) ta wordo investiga pa su presunto participacion cu delincuencia organisa.
Apenas dianan pasa, Bucaram a anuncia su plannan di postula su mes como candidato pa presidencia den e eleccionnan di proximo aña, un momento hudicial hopi complica p’e.
Oranan prome cu haci su peticion como candidato, riba rednan social a circula un audio di un presunto combersacion entre Bucaram y e ciudadano Israeli, Tomer Sheinman, cu a wordo asesina den prizon ora e tabata deteni pa supuesto benta ilegal di medicina.
E dialogo ta presenta un presunto trafico di influencia, e abogado di e politico a declara pa prensa local cu tabata verificando e informacion pa prepara e defensa.
Na juni, e ex-mandatario (cu a presidi e pais durante seis luna prome cu a wordo expulsa pa Congreso na 1997) a wordo aresta despues cu a realisa un entrada hudicial na su domicilio na Guayaquil. E ta considera sospechoso di presunto apropiacion no debido di fondonan di Estado cu un contract di material medico di Hospital di Seguro.
Den tanto, na final di juli Husticia Ecuatoriano a dicta prizon preventivo pa su tres yiu pa presunto asociacion ilicito pa benta di materialnan medico.
