Diamars atardi, a keda conoci den comunidad cu varios persona hoben a sali positivo pa e prueba di Covid-19 door cu nan a bishita algun restaurantnan of nightclub na unda supuestamente e virus a wordo plama.

Di esaki, Bon Dia Aruba a haya un screenshot for di e plataforma WhatsApp na unda un supuesto coordinador di gobierno di Aruba y candidato activo riba lista di partido MEP a comparti den dos chat group secresia medico di un pashent specifico cu a sali positivo pa Covid-19.

Bon Dia Aruba a manda un pregunta pa e conferencia di prensa di diaranson anochi: E ta aceptabel pa gobierno cu un coordinador y candidato activo riba lista di partido MEP ta comparti riba WhatsApp secreto medico di un pashent cu ta positivo cu Covid?

Di mesun manera, e pregunta aki no a wordo contesta publicamente sino cu a haya un pregunta back ta di ken ta referi; igualmente Bon Dia Aruba a tuma contacto directamente cu Starke pa puntra si el a haya autorisacion di parti di e persona contagia pa e por comparti su informacion medico cu comunidad.

Di esaki, Starke a expresa na Bon Dia Aruba cu “ami a haci un fout y a mi a tuma full responsabilidad pa esey, pasobra e tabata den ‘spur of the moment’ y mi a haci’e pa un grupo cu mi tin confiansa cune. Ma haci’e mas bien pa conscientisacion, e meneer ta pareha di un amiga di mi y mi no a espera cu nan ta bay saca un screenshot’.

“Pa motibo di panico ma haci’e y ya cu tur e casonan a bin a cerca, ma share pa dos grupo di WhatsApp cu mi no por culpa nan cu a saca e screenshot, pero e ta mi fout, e ta mi eror y a mi no mester a haci e cos ey ni manda nada cu tin di haci cu cosnan personal di hende”, Starke a manifesta.

Bon Dia Aruba a acerca un hurista pa puntra su opinion tocante leakmento di secresia medico di un pashent. El a sigura cu secresia medico di un pashent ta un cos hopi sagrado cu mayoria di biaha ni den Corte un file medico di pashent nan no ta habri’e pa proteha e privacidad di e pashent.

Asina leu e secresia medico ta bay pa motibo cu e ta algo cu ni Corte por obliga un dokter pa divulga cierto cosnan cu hasta por bira un strafbaar, pa via cu ta informacion confidencial y di salud di un hende ta bezig divulgando eynan.

E persona cu a comparti secreto medico di e pashent afecta por hasta habri un porta pa e pashent por pidi daño di perhuicio (schadevergoeding).

Bon Dia Aruba a tuma contacto cu famia di e pashent den cuestion y nan a garantisa cu den ningun momento e no a duna autorisacion pa ningun persona, incluyendo Starke divulga e informacion di su estado medico.

Ademas di esaki, Bon Dia Aruba a purba varios biaha di tuma contacto cu minister di Salubridad Dangui Oduber y di mesun manera Departamento di Salud Publico pa asina nan por duna nan opinion y otro banda di medaya tocante e caso specifico aki, unda cu Starke a comparti informacion confidencial y sensitivo di un pashent cu ta positivo cu Covid-19.

Bon Dia Aruba no a logra haya contacto cu ningun di nan, ni minister Oduber ni Departamento di Salud Publico. Den e potret abou Bon Dia Aruba a tapa e cara y nomber di e pashent pa su privacidad.