Pa duna contenido y echo berdadero na nan lema ‘beyesa cu proposito’, organisacion Miss Teen Aruba International hunto cu un bouquet di candidatanan den pleno splendor di nan bida, lo colecta fondo pa e fundacion Mary Joan Foundation cu ta brinda ayudo na e pashentnan cu cancer na pecho y nan famianan tambe.

Despues cu e candidatanan aki a atende un seminario unda nan a haya informacion tocante e trabou cu Mary Joan Foundation ta bin realisando y tambe cuanto gastonan nan tin, nan a cera cabes pa yuda nan. E conocido George Winterdaal cariñosamente conoci como “Tio George” y miembro di e directiva di e organisacion Miss Teen Aruba International, a laga sa cu nos tin e tendencia di warda te ora e malesa ta toca nos porta pa cuminsa actua y yuda.

E biaha aki nan a dicidi di realisa hunto cu e grupo di hobencitanan aki un obra cu sentido social. E evento lo carga e nomber ‘1 di juli cu curason pa Mary Joan’.

Curason pa Mary Joan
Den e caso aki e organisacion Miss Teen Aruba Internacional ta bira un escenario pa nan por bira e bos pa otro hobennan por yuda.

“Esaki ta e plataforma cu Miss Teen ta ofrece, no solamente e parti di beyesa, pero e parti di ta un beyesa cu proposito. E ta un beyesa social.” Nan lo bisti un T-shirt den tur caminda cu tin presencia di e candidatanan aki y tur boluntario pa realisa e colecta pa e fundacion menciona. Esaki lo ta diadomingo 1 di juli venidero for di 9’or di mainta te cu 6’or atardi.

E ta tuma luga na juli ya cu esey ta e luna di Miss Teen Aruba International cu lo tuma luga na mediado di juli awor. Durante e dia di colecta lo bay tin un radiothon cu participacion di varios emisora cu lo ta live for di sede di Mary Joan Foundation. Den parti di mainta lo tin un koffiemorgen cu bendemento di bolo, cos dushi, te, etc… Ya caba nan a cuminsa haya algun donacion di e forma aki.

Considerando cu e gasto cu e fundacion aki ta basta halto mas cu 100 mil pa aña, mientras cu nan entrada ta 30 mil pa aña, e ta kere cu e hoben candidatanan di Miss Teen Aruba y e organisacion cu ta realisa e evento, nan ta para tras di e proposito di beyesa cu proposito y nan lo recauda fondo pa e fundacion aki. Nan kier recauda un suma di 10 mil florin pa Mary Joan Foundation.

E 10 mil ta un number simbolico, ya cu e aña aki ta 10 aña di existencia di e organisacion. E ta haya cu e suma aki por ta no ta hopi pa e cantidad di gasto cu e fundacion aki tin, pero sigur e suma aki lo ta un alivio pa nan. Den pasado e organisacion aki a yuda colecta pa e fundacion aki y tambe nan ta bin realisando obranan social pa sigui duna contenido na e concepto di beyesa cu proposito.

Beyesa cu proposito
Nan a duna ayudo na diferente fundacion manera Casa Cuna Progreso. Tambe den pasado nan a bay haci un clean up den e cas di un pashent victima di cancer. Nan a haci e cas aki full limpi y pone tur cos nobo. Na februari ultimo nan a haci un evento ‘Cocktail di Speransa’ y e fondo recauda lo wordo entrega na dos fundacion e dia di evento final di Miss Teen Aruba dia 15 di juli awor.

For di aña cu nan a bin cu e certamen di beyesa aki, nan a cuminsa cu e logo ‘Algo mas cu un certamen di beyesa’. Sr. Winterdaal a bisa cu nan ta kere cu e beyesa no ta solamente pa e parti exterior, ‘pero bo beyesa mas importante ta e parti di bo curason’.

Presidente di Mary Joan Foundation, Arabella Colina a expresa palabra di gratitud na e fundacion organisado di Miss Teen Aruba pa loke nan tin plania pa realisa dia 1 di juli awo. Tambe el a duna e fundacion aki pabien den cuadro di nan 10 aña di existencia. Sra. Colina a bisa cu nan ta hopi contento cu e meta di 10 mil florin cu nan lo kier colecta e dia ey.