Despues cu HOF a dicidi cu keho di Candelario ‘Booshi’ Wever contra Otmar Oduber no tabata admisibel y despues cu Oduber a haci un conferencia di prensa haciendo diferente acusacionnan contra Wever, Wever a dicidi di bin dilanti pa reacciona riba esaki y duna e banda di su medaya.
“Mi kier a reacciona na declaracionnan hopi baho cu Otmar Oduber a bin cune, cu ora e kier desvia e atencion e ta bin cu cosnan cu no tin nada di haber cu e caso riba su mes,” Wever a bisa.
El a splica cu e tin tur documento cu ta prueba cu den e procedura pa compra di incinerador chikito tin hopi cos coruptivo y cu abuso di poder a tuma luga: “el a bin cu e pensamento hopi peculiar di cu ami como ciudadano no tin derecho y hasta e deber como ex politico, ex parlamentario y ex minister encarga cu medio ambiente e tempo ey, ta mi deber y mi obligacion di bisa cosnan cu ora no ta bon y e ta bin insinua cu a mi ta namora di su persona. Bo mester tin un mente hopi mediocre pa bo pensa asina,” el a sigura.
Di loke ta trata su caso na HOF, Wever a señala cu e ta sinti desapunta pa motibo cu hopi hende no ta para keto na e consecuencia cu e veredicto aki tin: “hues no a bisa cu Otmar Oduber no ta culpabel, hues aparentemente no ta comparti den punto 5 di nan conclusion pa yega na e veredicto aki, cu nan no a bay wak si tin strafbaar feit cu a wordo cometi of no.”
Wever a sigura cu Oduber ta un corupto, debi na e documentonan cu e tin den su poder y cu si Oduber no ta lanta un caso contra su persona, “bo ta admiti cu bo ta un corupto y mi ta kere bo tin e oportunidad pa lanta un caso contra mi. Ora cu hues a bisa cu mi ta niet-ontvankelijk pasobra, segun hues, mi no tin motibo pakico mi haci’e. Esey no tin nada di haber si bo ta culpabel si of no, pero ta crea e impresion den pueblo cu e ta inocente; Otmar no ta inocente.”
Igualmente, el a sigura cu Oduber kier haci como si fuera cu e veredicto aki no tin su consecuencianan, pero si tin consecuencia: “mi ta lamenta cu e caso aki, full e file aki, tur parlamentario di awo y esnan prome, tin e file aki y ni un parlamentario a haya ta bon pa haci algo den esaki. E ta lamentabel, ami ta acept’e, pasobra mi ta kere den e sistema hudicial, pero si mi no ta di acuerdo cune y mi no tin ni un caminda pa bay.”
Den su opinion, Wever ta pensa cu Oduber no ta bay tapa su boca y cu e mester bin mas dilanti, debi cu Wever no ta bay keda keto y cu Ministerio Publico “ta drumi.”
Tambe, e ta sigura cu ora el a lanta e caso na HOF, el a bisa e motibonan di pakico e ta kere den HOF: “pero Ministerio Publico a manda un carta na HOF y bisa cu nan no ta wak cu tin un strafbaar feiten cu mester a bay un caso civil y cu mi no tin e interes den esey. Den e caso na HOF nan a laga e parti di strafrechtelijk cu e no ta strafbaar feit, dus de facto nan ta wak cu tin strafbaar feit. P’esey mi ta bis’e cu e ta corupto y pa e bay lanta un caso civil contra mi. Den e documentonan aki ta para hopi cla y mi ta invita tur hende pa por lesa nan lo cual cu tin.”
El a duna un mensahe na pueblo bisando cu “esnan cu ta entama caso na Openbare Ministerie Aruba cu mi ta sinti cu ta hendenan cu ta cana riba e beach pa pasa tres aña di vakantie akinan, nan no kier persigui e politico. E politiconan den ultimo añanan a presta nan mes pa haci corupcion y si Openbare Ministerie no ta wak esey, a mi no sa kico mas pa haci. Riba e caso aki, mi ta spera cu Otmar Oduber sea un macho crioyo y bay corte cu mi.”
E caso aki ta bin for di december di aña 2019, na unda Wever a bay Ministerio Publico pa entrega un denuncia contra e ex mandatario y a entrega tur e pruebanan cu mester pa cuminsa haci un investigacion, incluyendo parlamentarionan, manera el a sigura, pero esey no a sucede.
Wever a informa cu na comienso di aña 2019, partido UPP a haci un peticion na Oduber pa entrega nan e copia di documentonan di onderhandse aanbesteding di incinerador chikito y nan a bay pa un procedura di LAR cu despues nan a haya e documento.
E ta sigura cu tabatin iregularidadnan rond di destaho publico pa loke ta trata e incinerador aki, cual tabata diseña pa exclui otro companianan di participa.
Despues nan a haya tempo pa studia y analisa locual nan a sospecha for di comienso: cu tabatin un abuso di poder. Pero tambe tin un cambio di cifranan, cifranan cu no ta cuadra precisamente cu e placa cu tabata disponibel na e momento ey, aumento di prijs pa haya casi tur 1.8 miyon florin. Esey a cambia e situacion cu ta bisa kico mester wordo haci y kico ta ofrece pa e solucion di kimamento di desperdicio medico.
Wever tambe a comenta cu un otro compania a sali miho y a cambia e procedura, a split e destaho publico papiando di incinerador chikito, pero tambe e operacion di dje. Nan a pone un parti di incinerador cu DOW a cumpra y e otro parti cu Serlimar mester cumpra, pa motibo cu si nan a pone hunto e compania cu ta sponsor—segun Wever mes a bisa—e amigonan di Oduber lo a sali hopi mas caro.
Den un comunicado di prensa di dia 17 di maart ultimo, Ministerio Publico a informa cu “Corte Superior a dicidi ayera cu Wever no ta admisibel (niet-ontvankelijk) den su keho. Wever a dirigi su keho contra e hecho cu Ministerio Publico no a tuma un decision pa persigui, entre otro, minister anterior Otmar Oduber pa soborno, falsificacion y estafa acerca di e aanbesteding y gunning di compra di e incinerador. Contra e hecho aki di Ministerio Publico Wever a entrega un keho na HOF na october 2022 den cual su keho a wordo declara inadmisibel.”
