Despues di hopi tempo di tabata keto, mi amor patrio ta pone mi cu mi tin di reacciona riba gañamento di un director di DOW cu parce ni berguensa e tin. Cu cara di palo ta draai riba e stoel y ta scupi mentira tras di mentira. E sa cu e ta sinta riba “hete kolen” y e sa cu lo tin hende cu por refuta delaster un di su mentiranan. No ta pornada mi a inclui su persona den mi denuncia penal contra e Santito “cobarde” Corupto Otmar!

Otmar a reta tur hende cu ta trata di daña su nomber y mi a acepta e reto y a yam’e un corupto na varios ocasion. Te awe mi ta sperando un “oproep” pa un caso den corte. E por a bolbe “get away with crime” cu ayudo di su amiguito ex-PG, pero dilanti hues mi lo prueba pakico mi conclusion ta cu e compra di e incinerator ta un acto corupto. Compra di un porkeria cu al final nos pueblo ta bay paga p’e. Pa colmo awor e director kier hustifica compra di un otro porkeria, siendo cu e sa desde cuminsamento cu esaki ta e caso, mirando cu e mes a pone esaki den un carta, cu ta trata e uso “restfonds” di FDA pa drecha planta di RWZI na Bubali urgentemente, mirando e peliger di e planta aki.

Ta parce cu e director di DOW ta purba di na prome lugar scapa peyeho di dje, di e Ex-minister corupto, full e gobierno anterior y esun actual. Y pa colmo e ta hustificando compra di un otro incinerator cu NUNCA a cumpli. E racha di corupcion a cuminsa ora mayoria di esnan cu por a participa na destaho pa incinerator a pidi pa cancela henter e procedura. E director ni e ex-minister no a ni hik, conforme reglanan di Good Governance y di destaho publico, pa para esaki.

Asina e ta papia di redundancy di e aparato! E sponsor mes di Ex-minister a bisa den un reunion, y esaki ta documenta den e notulanan, cu nan (CTC) NO tin esey y nan no mester di esey tampoco! Pero na e momentonan aki e incinerator no por kima! Esaki so mester ta un motibo pa descualifica loke e sponsor ta ofrece, mirando cu e no a cumpli cu e bestek. Den un carta cu e director mes a manda pa e Ex-minister corupto, e ta bisa cu e aspecto di redundancy ta indispensabel y “maatgevend” den e proceso aki! Dicon “donder” bo mes a sostene e Ex-minister corupto pa cumpra e incinerator porkeria aki toch anto? Miedo? Of e ta complice?

Den e MB ta poni hopi cla cu e incinerator mester por “verwerk” 15-20 ton diariamente y no manera e director a bisa durante e conferencia di prensa! Si e incinerator ta cumpli cu loke a acorda, facilmente e aparato mester por cumpli cu e demanda actual! Y obviamente awor NO mester bay over na cumpra un otro porkeria! Pues e incinerator ta un “miskoop” y e director sa esey, pero kier purba di scapa cara di su mes y di e ex-minister Otmar door di mal informa y manipula cu cifranan incorecto!

Segun informacion ricibi ta cu te september 2023 e cantidad cu a yega dump ta leu di loke e director a trece padilanti durante e rueda di prensa. Pa loke ta trata “medisch afval” esaki te september 2023 ta 358 ton. Sinembargo den e desperdicio di e.o. hospital ta bin mas cos cu “medisch afval” y esaki pa falta di un miho control kico ta drenta. Asina mes esaki ta mucho mas abou di loke e bestek ta bisa.

E cifra pa cadavernan ta hopi mas abou cu a ser acorda. Te cu september ta 78 ton di cadavernan, inclusivo loke ta bin for di abattoir. E cifra acorda ta 250 ton pa aña! Loke cu a corona obra ta e cantidad di ton di “sludge” cu a yega dump pa kima den e incinerator. Te cu september esaki ta 579 ton. Esaki ta nifica unicamente 3 ton pa dia ta ser kima den e incinerator, compara cu 10 pa 15 ton acorda pa dia!

Awor ken e director kier purba di gaña of defende? E porkeria aki simplemente no a cumpli! Y for di un principio mi persona a bisa esaki, pero “nobody cared”! Y awor en bes di pone e sponsor responsabel pa esaki, kier recompens’e pa cumpra un of dos di e porkerianan aki mas. Aparte cu e incinerator aki ta hopi mas caro cu e otro ofertanan, e incinerator aki no ta sirbi ni pa tira afo!

 

Ban wak si awor si nos Parlamento ta lanta for di “winterslaap” y haci trabou di e corupcion aki. Den e henter e procedura aki no solamente mester cuestiona e ex-minister Otmar pero tambe su coleganan minister cu ta complice den henter a bagamunderia aki sin kita afo e “eerste adviseur” di e ex-minister (cu awe ta man drechi di minister president) y last but not least e director di DOW, cu a hunga y obviamente ta sigui hunga un rol hopi prominente di complice den henter e asunto cuestionabel aki.

Un director cu semper a hiba un maneho sin pia sin cabez y tur esaki pa complace cu locuranan di e minister. Djis pa menciona algun: ta traha un rapport contra un compania local, riba insistencia di e ex-minister, bisando cu loke e compania local ta haci lo ta malo a sabiendas cu kimando e sludge uzando palet ta cumpli cu e normanan di EPA. Esaki djis pa complace cu Otmar.

Un otro prueba di mal maneho ta ora ta duna bouwvergunning sin exigi pa inversionnan cuantioso ser haci den e RWZI-nan. Of ta traha 3 rotonde y no ta worry cu e plantanan di RWZI cu dia pa dia ta bira un peliger grandi y imminente pa nos turismo. Y awe e director kier cuestiona otronan, pero ta su mesun maneho conduci cu awe e RWZI-nan tin problema y e incinerator no ta funcionando!

Por ultimo, dicon e director no ta publica e carta na unda e mes cu ta declara cu ta e ex-minister Otmar a oblig’e di acepta e porkeria aki?Asina por conclui cu e Director mester wak su mes den spiel y baha na awa ASAP!