Ayera mainta, Candelario ‘Booshi’ Wever a ofrece un conferencia di prensa pa asina informa comunidad cu el a entrega su di tres carta di ‘rappel’ na Ministerio Publico di loke ta trata e denuncia cu el a haci dia 2 di december 2019 contra un ex-minister.

Wever a conta cu aña pasa despues di entrega e di dos rappel dia 5 di juni, Ministerio Publico a contesta cu nan ta bezig cu esey, pero segun Wever a sigura un aña despues te ainda no a tende nada di e caso cu el a entrega contra ex-minister Otmar Oduber riba e compra di incinerator pa Parkietenbos cu segun e mes a señala ‘tabatin acto straño pa djis privilegia un hende”.

Ayera el a entrega un otro carta rappel na unda nan ta amplia cu un denuncia contra director di DOW Marlon Croes, contra prome minister demisionario Evelyn Wever-Croes y contra minister demisionario di Finansa, Asuntonan Economico y Cultura, Xiomara Maduro.

Segun Wever a bisa, esaki ta pa motibo cu tur hende sa kico a pasa cu onderhandse aanbesteding cu a tuma luga na 2018 door di ex-minister Oduber y manera el a menciona den caso aki “nos no ta papia di un florin, nos ta papia di un contract miyonario lucrativo pa Caribbean Truking Company (CTC) cu ta bay laba laba cu seis miyon florin”.

Wever a sigura cu e ‘argumento fofo’ cu director di DOW a trece dilanti den nomber di prome minister na unda a bisa cu “no tin ningun compania, ni ningun hende na Aruba cu por opera e planta aki” -esta e incinerator- supuestamente Wever tin un cantidad grandi di compania cu por haciel’e “pero lamentablemente a presta nan mes un biaha mas pa privilegia un sponsor di e ex-minister”.

El a expresa cu operacion di un incinerator no ta nada complica, na unda cu ta pone sludge of cadaver paden y e mashin ta traha pa kima pero cu awor nan ta bin y bisa cu no tin hende pa oper’e.

Tambe, el a sigura cu segun DOW a bisa nan por opera e incinerator y despues nan a trece dilanti cu no, “esaki ta e tipo di cosnan na unda ta pone cu pueblo no ta confia den politiconan mas” el a declara.

Manera Wever a expresa na 2020, DOW a bisa cu nan ta bay tuma e operacion di incinerator over “y aworaki un par di dia prome cu eleccion un gobierno cu tin un status demisionario ta bay presta su mes pa firma un contract miyonario cu mesun CTC cu a demostra cu no por a oper’e y di repente e ta bay oper’e, sin ningun tipo di destaho publico”, el a bisa.

Di e manera aki, nan ta actuando contra ley segun loke Wever a trece dilanti pa bira un caso penal, ta p’esey cu el a entrega ayera di manera oficial un denuncia contra e tres personanan aki pa motibo cu e ta kere cu dos dia prome cu eleccion pueblo mester por sa cu tipo di decisionnan asina ey no por sigui y di e manera ey Ministerio Publico por haci e trabou cu mester hacie’.

Tambe, el a declara cu pueblo mes ta acepta e tipo di ‘porkerianan’ aki cu e director di DOW ta bin haci como si fuera cu ta berdad cu no tin un otro persona of compania cu por opera e incinerator cu manera el a enfatisa “ta un compania amigo di e ex-minister Otmar Oduber”.

Asina mes, el a manifesta cu no ta berdad cu e compania aki ta bay cobra menos cantidad di placa pa motibo cu segun Wever, Croes a lubida di bisa cu e ta gañando pueblo den nomber di prome minister na unda cu a sigura cu esaki ta pa spaar.

“E informacion cu mi tin ta pa paga 109.000 florin pa luna pa open y burning e sludge riba e dump” Wever a anuncia.

Manera ta conoci, e incinerator aki te ainda no ta trahando, pero Wever a sigura cu si e lo tin un fayo e compania tin cu drech’e pero cu akinan esey no ta e caso, e compania aki lo opera e aparato so y si lo presenta algun incidente e pueblo tin cu bay paga pe.

Ademas, el a expresa cu e capacidad di incinerator aki no lo por kima tur sludge den e ora cu nan pone den e bestel, “nan a bisa den ocho ora mester kima tur e cosnan aki, lo cual cu no ta sosodiendo”.

Wever a declara cu esaki ta cosnan cu pueblo mester sa prome cu eleccion lo tuma luga pa asina pueblo por tuma un decision di sigui e “tipo di gobernacion asina ey of nan ta cambia realmente pa algo drechi pa Aruba”, el a sigura.

Esaki ta di tres biaha cu e ta presenta un carta di rappel segun Wever a comenta y ta kere cu ta yega un momento cu Ministerio Publico por tin otro trabou como e casonan di investigacion penal cu ta tumando luga pero cu e ta kere cu tin cu keda pendiente di dje y mustra nan cu pafo tin hende cu ta preocupa pero no pa e incinerator sino pa e corupcion y “mal gobernacion, privilegiamento, labamento, tur e cosnan cu ta poni contra Otmar Oduber”, el a finalisa.

Den un conferencia di prensa di dia 17 di juni di e aña aki, DOW a dicidi bin dilanti pa comunica con e tema di incinerator ta hinca den otro y con nan a bay asina leu, el a splica cu na luna di juni 2020 DOW a tuma over e proceso di incinerator for di Serlimar, pa motibo cu Serlimar na e momento ey tabata hinca den un situacion financiero dificil y e ora ey no por a cumpli cu e contract cu nan tabatin cu Caribbean Trucking Company (CTC).