Durante un entrevista cu Bon Dia Aruba a haci cu Candelario Ambrosio ‘Booshi’ Wever, el a laga sa cu despues di tur e prueba y keho cu el a entrega den contra di ex-minister Otmar Oduber, Ministerio Publico tin suficiente documento pa haci un investigacion contra dje, si nan bisa cu e pruebanan no ta suficiente, e lo hiba e caso te HOF.

Dia dos di december ultimo, Candelario Ambrosio Wever, miho conoci como ‘Booshi’, a bay Ministerio Publico pa entrega un denuncia cu tabatin di haci cu presunto iregularidad di parti di ex-minister Otmar Oduber den proyecto di incinerador na e dump di Parkietenbos.

Cinco luna despues, durante un entrevista pa Bon Dia Aruba, Wever a trece dilanti cu di e caso aki no a bolbe scucha nada. Tambe cu na luna di februari el a manda otro carta pa haya informacion tocante e caso aki.

Di mesun manera, Wever a duna di conoce cu cerca su persona el a haya comentarionan cu ta existi hopi incertidumbre di personanan cu ta traha na Serlimar. El a informa cu e incinerador chikito no a cuminsa traha ainda pa motibo cu mester warda expertonan di exterior.

Tocante esaki, el a menciona cu desde aña pasa e piesanan pa incinerador chikito a cuminsa yega y na luna di september e mester cuminsa haci su trabou, pero no por, pa motibo di diferente problema.

Di loke ta trata e keho contra Oduber, el a specifica cu el a entrega tur e pruebanan cu mester pa cuminsa haci un investigacion, incluyendo parlamentarionan. Siman pasa den Parlamento a trata e topico di DOW y algun aspecto di Serlimar y niun di e parlamentarionan cu tin den nan man e pruebanan, no a haci un pregunta. “Nunca mi no a haya un set di parlamentarionan asina incompetente”, Wever a sigura.

Tambe, el a manifesta cu na aña 1998 a sali un surseance van betaling cu na 2016 a wordo activa, na unda cu gobierno a bisa cu Serlimar mester cuminsa cobra. “Ami ta un persona cu no lo duna Serlimar placa sabiendo cu mi sa cu nan no tin un control manera mester ta”, Wever a señala. Ademas el a menciona cu aña pasa minister di Husticia, Andin Bikker a trece dilanti e surseance van betaling pa cobra hende y pakico? Ya Serlimar caba tabatin problema y no mester kita e base legal cu bo por cobra hende, Wever a afirma.

“Awor e pregunta ta si Serlimar tin derecho pa cobra hende, kico lo pasa cu e hendenan cu a paga caba?” Wever a bisa.

Asina mes, el a manifesta cu recogemento di sushi y maneho den totalidad di desperdicio na Aruba ta un tarea y un obligacion di tur gobierno. No por pone esey den mannan particular, pa motibo cu si un dia no hopi leu e luga ta na bancarota, tur luga ta tira sushi, ken su tarea lo bay ta despues? P’esey mester tin cosnan basico di cual gobierno ta responsabel. Principalmente si e persona tin un partido social democrata, cu tin e mayoria di coalicion den gobierno y no por permiti pa un otro partido, cu tin inclinacion hopi liberal, permiti pa e cosnan aki pasa cu un compania estatal manera Serlimar.

Aworaki cu Serlimar tin un director nobo, Wever a comenta cu e ta espera cu por tin transparencia y no lo hunga wega pa scapa e ex-minister cu segun e mes a sigura, cos ta mustra asina.

“Niun hende, te na e momentonan aki cu tin cu pone ex-minister Oduber pa para responsabel pa loke el a haci, ni un hende ta papia di dje”, Wever a bisa.

Manera a keda conoci, Wever a trece dilanti den varios ocasion cu e tin aproximadamente 30 reporte na unda e tin un keho oficial, cu 30 diferente punto. Tambe cu e ta kere cu algun cos a bay fout, di locual el a sigura cu “Otmar Oduber ta un corupto”.

Di esaki, el a señala cu si e documentonan aki no t’ey mes of lo cual e ta papia ta rumor, e consecuencia di loke ta pasando aworaki cu e compania Serlimar ta pa motibo cu nan tabatin un mal gobernacion. “E hecho cu a saca Ser’i Teishi for di su sponsor tambe ta un prueba y eynan tambe e destaho a bay incorecto”, Wever a expresa.

Tocante e keho cu Wever a entrega na december ultimo Bon Dia Aruba a puntra Wever con leu e ta bay yega cu e caso aki, el a contesta cu e no ta bay para. “Si Ministerio Publico ta bisa mi cu nan no tin motibo pa persigui Otmar Oduber, mi ta bay HOF.” Esaki pa motibo cu e ta considera cu ta inaceptabel cu Ministerio Publico, cu tur e documento cu el a presenta nan, por yega na e conclusion cu no tin un ‘strafbaarfeit’ y lo bay te HOF cu e caso aki pa nan por haci un investigacion.