Diahuebs atardi pa mas o menos 4.45pm a bati alarma na Dr. Horacio Oduber Hospital pa motibo cu a constata candela riba dak di e edificio bieu, na unda trabounan di construccion y renobacion ta tumando luga.
Durante di oranan mas trempan trahadonan a duna di conoce cu nan ta hayando holonan straño y di biaha e “hulpverlenersteam” di Hospital a bay den accion pa mira di unda e holo por ta biniendo. Manera cu a constata e origen di e holo di huma “ploegleider” di e “hulperverlenersteam di Hospital a bay paga e candela. Na momento cu Brandweer a yega Hospital nan a tuma over pa asina sigura cu e parti critico a pasa y e candela ta completamente paga.
Hospital tin su mesun di team di calamidad cu ta prepara pa si un calamidad sosode nan bay den accion. Riba pisonan unda pashent ta hospeda tabatin algun molester di huma y pues di biaha a tuma accion pa evacua nan den forma di prevencion mirando cu e meta principal di e “hulperverlenersteam ta pa salvaguardia e siguridad di pashent. Brandweer a inspecciona e edificionan y manera cu nan a declara nan sin peliger e pashentnan por a bay bek nan camber.
Un incidente chikito den forma di candela unda trabounan di construccion y renobacion di Hospital ta tumando luga a ser atendi den forma rapido pa team di Hospital conhuntamente cu Brandweer. Aunke a resolve e incidente aki den forma profesional y rapido pa preveni Hospital a tene warda durante oranan di anochi te cu mainta na e sitio unda e candela a cuminsa pa sigura cu tur cos ta bou di control. Danki na ful e team di Hospital y Brandweer cu a resolve e incidente aki lihe pa asina cuido di pashent por a continua debidamente.
