(AP) – Islanan Canari su president regional Fernando Clavijo a bisa diadomingo cu polis a confirma cu e candela riba e isla turistico Spaño Tenerife a ser causa deliberadamente. Clavijo a bisa cu polis a habri tres linea di investigacion pero no a confirma si tin aresto of no.
Condicionnan di tempo mehora a yuda e bomberonan logra haci avance durante anochi den nan bataya pa calma e candela cu a crece fuera di control pa e ultimo 5 dianan, segun autoridadnan a informa diadomingo. “E anochi tabata sumamente dificil pero danki na e trabao di e bomberonan, nos ta mirando resultadonan sumamente positivo,” gobernador di Tenerife Rosa Davila a bisa na un conferencia di prensa.
E islanan Canari tin e ultimo varios aña den secura, di mesun manera cu Spaña. E islanan tin recordnan sumamente abao pa loke ta trata yobida den añanan recien a causa di e cambio den tempo causa pa cambio di clima. Aunke e candela na e parti noordoost di e islanan no ta cerca di e areanan turistico principal, e gobierno regional a ordena un evacuacion di e hotel di e estado den e parke nacional Teide. No a keda inmediatamente cla cuanto persona tabata kedando na e hotel.
Davila a bisa cu mas di 12,000 persona a keda evacua for di nan cas desde cu e candela a cuminsa diamars. E islanan su servicionan di emergencia a bisa cu 11,600 hectar a keda kima. No tin reportahe di heridonan te ainda y Davila a bisa cu esaki ta danki na e bomberonan y ningun cas a kima te ainda.
E candela, cual ta describi como e pio candela cu Tenerife a yega di mira den decadas, ta menasando 11 area cual ta extremadamente dificil pa e bomberonan yega na dje. E servicionan di emergencia tambe a informa cu mas o menos 19 area su calidad di aire no tabata bon y a urgi hendenan pa keda paden lo mas cu nan por y haci uso di tapaboca si nan tin cu sali for di nan cas. Mas di 400 bombero y soldaat a drenta den accion ademas di 23 helicopter y avion pa carga awa.
Spaña tambe ta preparando pa un otro ola di calor cuminsando for di diadomingo cu lo dura te diahuebs. Spaña su servicio meteorologico a bisa cu e temperaturanan lo subi gradualmente den partinan di e pais y yega te 40 grado celsius riba diaranson y diahuebs. Riba Tenerife, e agencia a calcula un temperatura maximo di 30 grado Celsius pa e siman binidero.
Segun European Forest Fire Information System, Spaña ta lidera e lista di paisnan di Union Europeo afecta pa candelanan e aña aki, cu mas o menos 75,000 hectar kima, cu Italia y Grecia su tras.
Mas di 2,000 persona a keda evacua a causa di candela cu a cuminsa rond di e isla La Palma luna pasa, unda cu mas o menos 4,500 hectar a keda afecta. Spaña ta responsabel pa mas o menos 40% di e casi 800,000 hectar kima den e Union Europeo pa aña 2022 segun e agencia.
