Diadomingo mainta gran parti di Simeon Antonio y Bucutiweg a manece bao huma di dump. Esaki segun un habitante cu no tabata mucho contento, ta bisa cu e huma tabata sofoca tur hende. Por a lesa cantidad di comentario riba rednan social caminda hende ta discuti riba con ”Green” en berdad Aruba ta birando actualmente.
Diadomingo tabata un dia hopi straño tambe caminda e clima tabata insoportabel di calor y no tabata tin biento. Pues e calor combina cu e huma fini y e holo malo tabata move bin riba e bario. Segun un habitante den e area, esaki tabata lanta hende for di soño a pesar di a drumi cu airco. Pues den bo camber, sala di cas, cushina y tur caminda ta hole dump. Na e Boutique Hotel Vista al Mar, E Yacht Club Bucuti y Varadero tambe por a experiencia esaki.
Trahadonan na e tent di cuminda di Yacht Club Bucuti ta comenta cu nan tin basta molester di esaki y cu cliente mes tambe a cuminsa puntra kico e holo ey ta y dicon esaki ta sosode. Nan ta agrega cu nan a firma peticion varios biaha caba pa nan para cu e candela aki cu aworaki ta sosode tur siman y nan ta hopi preocupa cu nan por bira malo di dje.
”No por a laba paña y mayornan cu yiu chikito cual ta varios den famia riba e strip di Bucuti y Simeon Antonio, mester a tene nan yiu paden di cas, e ta sofocante!” un habitante a post riba Facebook.
Habitantenan den e area ta basta preocupa y disgusta cu ainda no tin solucion pa e problema aki na Parkietenbos. Te na Ponton por a haya holo stinki ayera y negoshi na Linearpark tambe a wordo afecta di esaki. ”Tur cos ta mustra di pafo cu ta bayendo mas ”Green” cu nan esfuerso nobo pero esaki ta completamente al contrario!” un otro habitante ta comenta.
Bon Dia ta spera di haya un contesta pronto di Departamento di Naturalesa y Medio ambiente Aruba tocante e tipo di incidentenan aki y con nan ta afectando medio ambiente.
