(Infobae) – Candela na Amazonia Brasileño a aumenta hasta 120% na mei, compara cu cifra di april ultimo unda tabatin 1.692 candela reporta durante e luna segun Gobierno a informa siman pasa.
E candelanan, sinembargo, a disminui un 26% compara cu loke a notifica e mesun luna di 2022, segun datonan di satelite di Instituto Nacional di Pesquisa Espacial (INPE). Na mei di aña pasa e number di candela forestal reporta den e area mas humedo di Brazil (Bioma) tabata cerca di 2.300 esun di mas halto den ultimo 18 aña.
Selva Amazonico ubica den area aki ta esun di mas afecta pa candelanan y ta concentra e 43% di tur loke a kima na e pais den casi cuatro decada. Solamente na 2022 a crece cu 14% compara cu 2021, cu un total di 163.000 kilometer di selva destrui. Esaki ta resultado di kimamento relaciona cu deforestacion y maneho di areanan pa ganado. E deforestacion na Amazonia, causa principalmente pa mineria ilegal y cortamento ilegal di matanan pa comercialisacion di palo, ta un problema cu a aumenta casi 60% durante Gobierno di Jair Bolsonaro (2019-2022) debi na falta di control.
E recuperacion di Amazonia ta un di e principal compromiso di Gobierno di Lula da Silva, cu ta haci esfuerso pa combati actividadnan ilegal den area aki y ta recorda na e paisnan cu mas recurso e necesidad di apoya financieramente e bataya aki pa evita un crisis climatico mundial.
Piscanan di Amazonia Brasileño ta contamina cu mercurio na nivel cu ta surpasa e limite aceptabel, segun un estudio publica siman pasa pa Fundacion Oswaldo Cruz, e centro di investigacion medico principal di Latino America.
Mineronan ilegal ta usa e metal pa saca e oro den area aki y segun expertonan, su uso sin control tin den riesgo e siguridad di alimentacion den e region.
