Pa basta tempo caba habitantenan di Parkietenbos y vecindario ta kehando di e huma cu ta bin for di e dump cu ta den nan area. Den forma di union pa combati nan disgusto habitantenan a lanta un fundacion y tabata algun dia pasa cu e fundacion a dirigi su mes na minister president Mike Eman, pidiendo un fecha concreto cu lo cera e dump.
Ayera nochi habitantenan a tuma nota cu atrobe dump na Parkietenbos ta na candela y segun un di e habitantenan por a scucha varios explosion. No ta conoci kico exactamente a pone cu e candela lo a ‘start’ y bira asina grandi.
Un habitante ta splica cu a notifica brandweer pero a comprende cu tanten e huma ta bay direccion di lama no tin motibo pa page. Segun e habitante ta sigui splica, den su yamada pa number di emergencia 911 nan a puntra specificamente si e candela ta paden of pafo di e dump. Tambe e habitante ta bisa cu a pasa un pickup di brandweer pa saca potret pero nada otro cu esey.
Den un reaccion pa NoticiaCla, Sr. Eman a bisa algun tempo atras “Nos a dicidi cu nos ta cera e dump aki, y nos ta den proceso pa cera e dump.” Ya caba a purba cu un proyecto di gasificacion di e sushi y converti esaki den energia pero e proyecto no a logra. Te na e momento aki no tin claridad kico e solucion exacto lo ta pa e dump cu ta treciendo hopi molester pa e habitantenan di cercania.
Segun por a comprende, minister De Meza a presenta pa wak e situacion. Nos redaccion lo tuma conta cu e mandatario durante dia pa busca mas informacion.
Nota: Te na momento di redaccion di e noticia aki, e dump tabata na candela.
