A drenta un melding awe mainta cu tin candela riba Renaissance Island (video), cu a pone bomberonan na caminda pa e isla pa wak con por a combati e candela aki. Vocero di polis Liliana Rasmijn a confirma na nos colaborador NoticiaCla.com cu un melding di candela riba e isla, a drenta 7:35am. For di e gerente general di Renaissance mes, Paul Gielen a confirma: “E restaurant so a kima y no tabatin heridos. Y e restaurant ta sigura tambe. E staff y e flamingonan ta den bon estado”. Flamingo Island lo habri pa nos huespednan for di 12’or di merdia. E resto di e isla ta keda cera, pa asina e trahadonan por prepara esaki pa por ta cla pa mañan. Tur esaki mientras cu nos ta reconstrui nos restaurant atrobe”.
Fuera di e restaurant, nada otro no a daña. Y importante ta cu e flamingonan cu ta porta e propiedad mas popular y importante di e isla, ta sano y salvo. E gerente a manda un potret actual di e flamingonan, cu ta mustra cu nan tur tey y no a haya ningun daño debi na e candela.
