Awe tardi un candela grandi a sugeri na dump di Parkietenbos. Esaki atrobe tabata den e area unda ta dump tairanan bieu.
Segun un testigo e candela tabata asina feroso cu hasta a menasa bida di un trahado di Serlimar, kende ta yuda di domina esaki.
Un team grandi di brandweer y otro departamento a traha duro pa evita cu e candela lo a pega na ekipo di Serlimar. Minister encarga a bin tambe pa pone su mes na haltura. Un investigacion a cuminsa pa haya sa kende a causa e candela. Pasobra tin indicacion cu a pega e dump na candela intencionalmente.
No ta prome biaha cu e dump di Parkietenbos ta na candela, causando hopi molester pa e barionan pega na e dump. Y tambe trafico aereo. E biaha aki e candela no a strobe e avionnan.
E ultimo siman e dump tambe a den publicidad pa motibo cu a cer’e pa sushi di cas. Esaki a bay hunto cu e introduccion di tarifanan social. E sistema mester a bay na vigor 1 di juli pero despues di hopi protesta, gobierno a dicidi di hala e fecha aki pa 1 di januari 2019. Tambe lo introduci otro aña un otro sistema pa paga e recogemento y procesamento di sushi.
E problema a cuminsa momento cu Serlimar a lanta na 2005 y a introduci un tarifa pa pueblo paga. Sinembargo den practico hopi hende a keda sin paga, hincando e compania di sushi den problema financiero. Tambe tabatin hopi metemento politico den e maneho di Serlimar, cual ta stroba e compania ehecuta su tareanan defini den ley.
