(EFE) – Candela den mondi registra na Brazil den prome nuebe luna di 2024, esun di mas grandi den 14 aña, a afecta 18.9 miyon persona directamente, di cual 10,700 mester a bandona nan cas segun un balans di Confederacion Nacional di Municipio (CNM).

Di acuerdo cu un rapport publica diahuebs ultimo y cu ta recoge dato manda pa CNM di tur municipio di e pais, candela a provoca te awor perdida di hasta 2.000 miyon real (365 miyon dollar).

E organismo a califica e dato como “alarmante” si ta tuma na cuenta cu candela forestal registra pa Brazil entre januari y september di aña pasa a afecta solamente 12,700 persona y a provoca perdida di 36.1 miyon real (6.6 miyon dollar).

Segun Confederacion, cu a aclaria cu informacion te ainda ta hopi parcial y ta actualisa continuamente pa alcaldia, e number di municipio cu a declara situacion di emergencia pa candela a subi for di 43 den prome nuebe luna di 2023 hasta 684 entre januari y september di e aña aki.

CNM a bisa cu a haya rapport cu cinco persona a muri y otro 10,700 mester a bandona nan cas e aña aki pa via di candela , pero a aclaria cu e number ey por ta mas debi cu e mayoria di municipio te ainda no a manda dato tocante personanan evacua.

“Nos mester pensa riba e consecuencianan di e situacion aki pa casi 19 miyon Brasilero afecta directamente, principalmente cu nan salud,” e presidente di CNM Paulo, Ziulkoski, a bisa den un comunicado ora ta referi na aumento di hospitalisacion pa problema respiratorio na tur Brazil.

Entre e personanan afecta directamente ta inclui esnan di e huma cu a expande den henter e pais, esnan cu a busca atencion medico y cu a sufri cu interupcion di servicionan esencial.

Segun Instituto Nacional de Investigaciones Espaciales (INPE) cu ta usa imagennan di satelite pa conta diariamente e foco di calor na tur Brazil, e number di candela den prome nuebe luna a subi na 85% for di 114.796 na 2023, te cu 213.413 na 2024.

Ta trata di mayor number pa e periodo for di 2010.

Ministerio di medio ambiente ta atribui e cantidad di candela na e ola di calor intenso cu e pais ta enfrenta, cambio climatico y secura historico na tur Brazil, e mayor den ultimo 50 aña.

Segun e ministerio, 58% di teritorio Brasilero ta enfrenta efecto di e secura intenso y un 20% ta enfrenta secura extremo.