Un candela a kima un mural di 2000 aña di antiguedad y hunto cu e mural aki tambe a kima otro pida di un compleho arkeologico na noord di Peru, Walter Alva Director di museo Tumbas Reales di Sipan a informa.
“Ami a haya un noticia lamentabel tocante un candela cu a destrui e monumento arkeologico di Ventarron”, Alva a informa riba un comunicado.
Segun e arkeologo, Ventarron ta un representacion di arkitectura antiguo di noord di Peru, cu tabatin e pintura mas antiguo di America.
E candela a cuminsa ayera atardi, y el a bay cu algun pochi di ceramica, mural di mas di 2000 aña di antiguedad y tambe informacion documental cu tabata propiedad di e compleho arkeologico Ventarron na Pomalca, na region di Lambayeque.
E candela a cuminsa pa motibo un grupo di trahado di empresa Pomalca a cuminsa kima un tereno, caminda tabatin un cultivo di caña di sucu.
“Nos ta perde un monumento excepcional y unico riba su genero. Mi ta spera cu lo cuminsa un investigacion y asina haya sa cua hende ta responsabel di suceso aki. Ami kier mustra mi sentimento hopi tristo y di indignacion pa e perdida cu nos a registra aki”, Alva a bisa.
Bombero a sigura cu e suceso ta controla awor na un 95%. Fiscalia ta riba zona ey y eynan nan ta evalua tur responsabilidad pa grupo administrado di empresa Pomalca.
Den un comunicado, ministerio di Cultura di Peru a condena tur atake contra patrimonio cultural y el a solicita na fiscalia pa cuminsa tur investigacion riba e suceso di candela cu a produci na compleho di Peru.
El a bisa tambe cu e personal tecnico specialisa den conservacion di monumento, a move pa zona di Ventarron, pa asina evalua e daño cu candela a laga na luga ey.
E luga arkeologico Vetarron ta un luga cu mas di 4500 aña di antiguedad y ta na banda oost di e cero Ventarron.
