Candela den motor di planta RECIP na WEB

Ayera atardi a traves di un publicacion ariba nan pagina di Facebook WEB Aruba NV a informa comunidad ariba un candela cu a surgi den un di e motornan RECIP na e planta.

“Awe merdia a surgi un candela den motor RECIP #7 den planta di WEB. No tabatin heridonan y e situacion di produccion di coriente pa awor ta bou di control, pero si delicado. Actualmente e team di WEB ta bezig ta handle e situacion. Asina cu tin mas informacion, nos lo duna un update,” e publicacion a indica.

A pesar cu den e publicacion nan indica cu produccion di coriente ta bao control, e miedo cu ciudadanonan tin ta e posibilidad cu esaki por causa un otro blackout.

Manera por corda den luna di januari ultimo Aruba a pasa den un blackout na henter isla pa motibo di fayo den e olanta di motornan RECIP.

Diadomingo 21 di januari 2024 e prome blackout di aña a afecta henter e isla. E motibo di esaki tabata cu motor number 18 di e planta nobo di RECIP a paga automaticamente. Siguientemente e motor 14 cu ta compensa pa e produccion di motor 18 e frecuencia di e planta a baha abou di 59 hertz y un minuut despues, tres otro motor tambe a paga automaticamente un tras di otro, cu consecuencianan di un collapse total di e sistema. Ademas Vader Piet tambe a paga conduciendo na un otro black-out.

Esaki ta otro problema relaciona cu e motornan di planta nobo dk RECIP. Durante conferencia di prensa den luna di januari tocante e blackout di 21 di januari director di WEB Alfredo Koolman a sigura cu e planta nobo RECIP cu nan a traspasa na juni 2022 a conduci tambe cu nan a conoce 335 dia di aña pasa cu nan a opera e planta sin ni un problema. El a resalta cu e ta un cuestion di haci un esfuerso, investiga, determina causanan y tuma medidanan pa esey no ripiti.

El a agrega cu incidentenan por pasa, esey ta algo cu nan ta purba evita, pero e planta nobo aki 99.93% di e tempo a logra suministra 100% di e demanda cu ELMAR mester pa e isla.

Den luna di december ultimo tambe tabatin un Brown Out, pero esaki el a informa e motibo tabata un fayo den un parti di e planta cu ya tabatin presion caba pa 60 aña y nan ta manteniendo e parti akinan.

El a indica cu nan ta bay traha pa reemplas’e lo mas pronto posibel y cu tin proyectonan cu ta andando pa algun tempo caba pa reemplas’e pa busca sistemanan cu ta mas sigur, cu ta opera mas stabiel.