Diahuebs marduga un miyon cas di pueblo di Santa Olga a disparce, pa motibo di un candela forestal cu ta afecta na centro sur di Chile y a consumi 160.000 hectar mesun momento cu a causa fayecimento di shete persona. “Ta un situacion grave, di teror, di nachtmerrie cu no tin nomber, cu un fin cu no tin un script”, Carlos Valenzuela, alcalde di Constitucion a bisa. Constitucion ta un ciudad bisiña di pueblo di Santa Olga, na 360 kilometer na sur di Santiago.
“Tur cos a kima” el a bisa. “Awe ta un dia largo, cu nos lo tin mal noticia y ainda nos tin cu descubri un potret cu ningun hende kier mira”, Valenzuela a bisa relaciona cu hopi hende cu tabata den caminda ora cu candela a cuminsa kima tur cos den cercania, pa motibo di hopi coriente di biento cu ta cambia direccion cada rato.
Mas di 6 mil habitante di Santa Olga a logra bay for di e luga ey, na momento prome cu e candela cuminsa kima tur cos den nan hardin, polis y cas, Alcalde Valenzuela a bisa. Tambe el a informa cu ta spera informacion tocante ubicacion di dos hende grandi cu a disparce desde diaranson, cerca di Constitucion. Tres funcionario di brigada di rescate a fayece kima, ora cu nan tabata combati un candela na Vichuquén na memey di luna aki, y diaranson a muri un bombero y dos polis tambe. Nan a informa di otro persona cu a muri, pero te awo nan no tin hopi detaye, el a wordo inclui den lista di 7 victima cu presidente Michelle Bachelet a traha.
