E canciyer di Brasil, Aloysio Nunes, a bisa cu e idea di un hipotetico intervencion militar na Venezuela pa soluciona e crisis na e pais ta “puro y simplemente delirio,” segun declaracion recogi pa e diario Folha de Sao Paulo.
E declaracion di Nunes a bin despues cu e ex ministro Venezolano Ricardo Hausmann, profesor di e universidad Mericano Harvard, a pidi recientemente den un articulo pa considera e posibilidad di un intervencion militar internacional aproba pa parlamento -di mayoria opositor- pa saca Chavismo di poder na Venezuela.
“Ni e surrealismo mas delirante lo por imagina cu e Conseho di Siguridad di Nacionnan Uni, cu Rusia y China, lo aproba un accion di e naturalesa ey”, Nunes a bisa e corant, a pesar cu Hausmann ta señala cu e eventual operacion no mester di e improbabel apoyo di ambos pais, aliado di gobierno di Venezuela.
Pa e canciyer, “pa mas cu e scenario surrealista aki bira concreto”, gobierno Brasileño no lo manda tropa Venezuela. “E debate solamente ta yuda Maduro y e sectornan mas radical y mas resistente na cualkier tipo di negociacion den e regimen Venezolano,” e ministro di Relacion Exterior a añadi.
Den su articulo, Hausmann, ministro di Planificacion na 1992 y 1993, y actual academico di Harvard, a compara e salida cu el a propone cu e liberacion di Europa di e Nazinan.
Nunes tambe a considera cu a pesar di e deterioro na Venezuela, lo tin cambio na e pais, pero cu esakinan no lo bin na man di un intervencion militar internacional.
E canciyer tambe a bisa cu no tin na bista ainda e regreso di e embahador Brasileño na Caracas, Rui Pereira, despues cu gobierno Venezolano a ordena e expulsion di e diplomatico, dia 23 di december.
Como contesta, Brasil a declara Gerardo Delgado, e diplomatico Venezolano di mayor rango na e pais, persona non grata.
“Nan a tuma iniciativa y nos a tuma un iniciativa reciproco. Nos ta continua cu relacion politico cu Venezuela, pero nos a bolbe na e nivel politico anterior na e salida di nos embahador”, Nunes a precisa.
