(EFe) – Canciyer Colombiano Alvaro Leyva ayera dialuna a pidi na embahador di Israel, Gali Dagan, pa bay for di Colombia, memey di un crisis cu tin den e relacion bilateral debi na e postura di e presidente Gustavo Petro pa atakenan di Hamas y e reaccion di Estado Hebreu contra e Franja di Gaza.
“Historia di diplomacia universal ta bay establece como un señal e pataneria insensato di embahador di Israel na Colombia pa Gustavo Petro Presidente di Republica. Berguensa. Minimo pidi un excuus y bay. Inteligencia ta enfrenta cu inteligencia. Tin Estadonan den wega,” e canciyer a manifesta den un mensahe riba red social “X”.
Petro, ken tin un enfrentamento riba rednan social cu comunidad hudiu mundial, diadomingo ultimo a menasa di suspende relacionnan diplomatico cu Israel den respuesta na e decision di e pais ey di interumpi exportacion di siguridad pa Colombia “pa via di e declaracion hostil y antisemita di e mandatario.”
“Si tin cu suspende relacionnan exterior cu Israel nos ta suspende nan. Nos no ta apoya genocidio. E Presidente di Colombia mester respet y no por ser insulta.” Petro a bisa riba X.
Prome cu esey, Gobierno di Israel a informa cu a yama embahador di Colombia di e pais ey, Margarita Manjarrez, pa expresa su rechaso na manifestacionnan di Petro riba X den cual ta mustra un apoyo claro na e causa di Palestina y ausencia di un condena publico na e masacre y secuestro di centenares di civil Israeli di parti di Hamas.
“Den contesta como un prome medida, Israel a dicidi di stop exportacion di siguridad pa Colombia,” vocero di Ministerio di Relacionnan Exterior di Israel, Lior Haiat a bisa.
E crisis diplomatico cu Israel, pais cu ta un exportado importante di armanan y sistemanan di siguridad pa Colombia, a sorprende varios sector di sociedad ora a pidi na presidente prudencia pa e maneho di relacionnan exterior.
