‘Cancer ta un problema mundial cu ta keda crece’

 Minister di Salubridad Publico, Dr. Alex Schwengle ta considera e tema di hemato-oncologia hopi importante, ya cu e malesa di “cancer ta un problema mundial cu ta keda crece”.

Fei ayera y te diasabra awor, un grupo di specialista den Hemato-Oncologia di diferente institutonan prestigioso entre otro Netherlands Cancer Institute, Leids Universitair Medisch Centrum, Baptist Health International, ta realisando nan presentacion dilanti di mas cu 150 profesional di nos region den cuadro di e prome simposio multi-disciplinario di Caribe Hulandes, cu ta tumando luga na Holiday Inn Aruba.

E mandatario a bisa cu aunke cancer no ta e causa principal di morto riba nos isla, sino e problema cardio-vascular, asina mes e problematica di cancer ta uno preocupante y e tin di haber cu e estilo di bida di nos poblacion.
Sinembargo e ta haya cu e situacion aki ta mehorando, ya cu cada bes ta wordo observa cu nos hendenan ta birando mas consciente di nan salud y nan ta moviendo hopi mas.
“Gradualmente nos ta mira cu nos ta realisando cu si nos no ta haci nada cu nos estilo di bida, nos indice entre otro di diabetico y tambe di cancer lo keda subi”, el a declara na Bon Dia Aruba.
Calidad di cuido
P’esey e ta considera cu e trabou cu su coleganan riba tereno di salud ta realisando ta sumamente importante. Ademas e tipo di simposio aki ta hopi importante pa Aruba su specialistanan y e veld cu ta traha cu oncologia, mantene nan mes den e nivel di conocemento adecuado internacionalmente.
Den e tipo di simposio aki nan ta comparti conocemento y ideanan cu profesionalnan di afo, y nan ta mantene nan mes actualisa. Di e forma aki nan ta garantisa pueblo cu nan ta haya e cuido mas miho cu ta existi pa atende cu e malesa di cancer.
Dr. Schwengle a bisa cu tambe di parti di gobierno y como minister encarga cu Salubridad Publico, e ta presente den e simposio aki pa scucha y wak kico ta e necesidadnan riba e tereno aki y asina purba adapta e maneho cu tin pa e pas cu e necesidad cu tin na pais.