Cancer di pecho por tin varios efecto riba un pashent; Sosten social, psicologico y amor ta esencial pa eherce e privilegio di yuda

October ta e luna unda cu ta enfoca riba conscientisacion tocante Cancer di Pecho, den cuadro di esaki, Bon Dia Aruba a acerca Mary Joan Foundation Aruba, pa asina por trece un poco mas di atencion na y informa tocante e fundacion su trabao pa cu cancer di pecho, y con cancer di pecho ta afecta nos comunidad Arubano.

Nos a combersa cu Arabella Colina ken ta representante di Mary Joan Foundation y tin casi 10 aña caba como boluntario di e fundacion. E aña aki Mary Joan Foundation a cumpli 15 aña como fundacion, cu e enfoke di su ayudo den e area psicosocial, pues brindando sosten na e pashentnan cu a pasa den e malesa ademas di nan familiar y/of circulo cercano.

Mary Joan Foundation a nace di un grupo di amiga cu a bay duna un charla na un congreso na aña 2000. Di ey nan a sali dilanti kitando e tabu rond di cancer di pecho. Despues di 7 aña nan a cuminsa un fundacion, y a duna e nomber Mary Joan na honor di Mary Joan ken ta e prome den e grupo di e 4 amiga cu a fayece.

E sosten psicosocial cu e fundacion ta duna ta encera ayudo di psicologo gratuitamente, tanto na nan persona como nan circulo cercano/familiar, gruponan di charla, bishita na hospital of cas, y ayudo spiritual si e ta desea esaki y dirigi e pashentnan na dokternan cu posiblemente nan tin mester. Tambe nan ta organisa actividadnan social, manera workshops, actividadnan manera un atardi di relaha na e fundacion, caminata, bay wak e bahada di solo, of obra di man na e fundacion tambe. “E meta ta pa saca nan for di e momento di tanto tristesa cu nan ta aden, y laga nan mente enfoca riba algo diferente,” Arabella a splica.

“Mi kier ta hopi cla cu esaki pa tur hende compronde cu nos no ta duna placa,” el a enfatisa. “Nos ta duna sosten na varios manera cu ta social, psicosocial, pero nos no ta duna placa.” E sosten financiero ta bini den manera indirecto, via di servicio di psicologo por ehempel, cual ta “gratuito pa e cliente, mas no e fundacion. Nos como fundacion si mester paga tur e servicio cu ta ser brinda na e pashent.”

Den aña 2018 e fundacion a cuminsa cu un proyecto yama ‘Un peluca, un sonrisa’ den cual tur pashent di cancer por ricibi un peluca traha na Mary Joan Foundation Aruba mes. E proyecto aki ta un ehempel cla di con e gesto di duna bo cabey den donacion por yuda un pashent. “Nos a ser certifica na Mexico pa traha peluca y ta traha esaki aki mes na oficina. Nos ta cuminsa for di comienso ta traha e peluca cu e cabey cu nos ta ricibi como donacion, nos ta match esaki na e cabey di e pashent y ta traha un peluca cu ta bira di e pashent, tur completamente gratuito,” Colina a comenta.

Aki ta unda nos comunidad Arubano ta drenta den accion. Pa medio di haci donacion of brinda sosten na recaudacionnan di fondo pa e fundacion. “Sin e ayudo di e comunidad, e fundacion no por sigui. Semper comunidad a brinda nan sosten, ta danki na e comunidad su ayudo, e boluntarionan y sosten di otro fundacionnan awe nos por tin 15 aña para.”

“Mi por bisa cu nos tin mas cu 200 cliente, tambe mi por bisa cu e edad a baha.” Mayoria biaha nos ta relata cancer di pecho den personanan di un edad mas grandi, sinembargo no por lubida cu e otro grupo di edadnan hoben, unda cu nos a mira cliente di 18, 24, 26 aña.” Nos no por ignora e hecho cu e estilo di bida cu nos hiba tanto como adulto y como hoben, lo tin un efecto riba nos salud den futuro, “loke nos ta hinca den nos curpa awo, por tin consecuencia aki 10,15 aña. E ta importante pa tin un structura bon pa nos mes. Stima bo mes y no haci bo mes daño.”

Arabella a continua ta comparti cu “for di momento cu bo desaroya bo pechonan, tanto mucha homber y mucha muhe, wak bo mes y fula bo mes. E parti di yuda nos mes ta cuminsa den nos man,” el a splica. Controla e pecho y wak e pecho regularmente ta sigui un di e maneranan mas principal pa nos por detecta cualkier cambio, y mientras mas trempan nos cuminsa cu esaki, mas trempan nos por crea un habito cu lo yuda nos den futuro.

Un efecto di cancer di pecho di cual nos no ta papia hopi ta e efecto psicologico riba e pashent. “En berdad e ta duro. Hopi biaha nan ta relata cancer cu morto, y no necesariamente ta asina. Bo tey awe, y bo mester biba pa awe,” Arabella a expresa. “Nos ta pidi tur hende rond di e persona pa brinda e sosten cu un simpel ‘con bo a lanta awe?’ ‘kico mi por haci pabo?’ ta haci un diferencia.” Ta e detayenan cu por aparenta mas simpel y mas chikito cu ta haci un gran diferencia den esunnan cu tin mester di dje, pa medio di brinda ayudo manera laba tayo, bari e cas pero “tambe ta importante pa respeta cu e kier ta su so. E ta necesario, e tambe tin cu procesa e situacion. Respeta e momento cu e ta pidibo pa ta su so.”

“Yuda y brinda sosten semper lo ta un privilegio” ta parti di e lema di Mary Joan Foundation Aruba. Arabella ta laga nos cu “Amor ta esencial den bida. Esey por ta den diferente manera, y esaki ta loke ta sumamente necesario den malesa.”