Canasta basico a conoce un ampliacion den e lista di productonan manera minister di Asuntonan Economico, Comunicacion y Desaroyo Sostenibel, Geoffrey Wever a anuncia diamars ultimo den un conferencia di prensa, esaki tin di haber cu prijsnan internacional ta aumentando y cu inflacion na Hulanda na luna di maart tabata di 12% y na Merca di 8%.
Aruba como pais cu ta importa casi tur cos, incluyendo productonan di gasolin, tambe ta importa inflacion, esey kiermen cu prijsnan internacional y local tambe ta subi, unda minister a señala cu e situacion aki no ta facil, cu tin hende cu tin dificultad pa por cubri tur su gastonan y pa e motibo ey nan a pidi pa wak ki posibilidad tabatin pa amplia e canasta basico “pa asina duna esnan cu tin menos recurso, at least algo pa nos por alivia nan di e dolor financiero”, el a sigura.
Asina ey nan a haya conseho di departamentonan di gobierno na unda nan a dicidi di amplia canasta basico na e momentonan aki cu cinco producto cu ta galiña frozen, corn flakes, pindakaas, frutanan seco y frozen y pampers.
Canasta basico awor ta consisti di 1.205 producto, cada un ta depende di diferente categoria y tamañonan, unda cu minister Wever a bisa cu esaki ta e manera cu por garantisa cu prijsnan no ta subi desproporcionalmente y ta mantene esey den prijsnan mas abou posibel pa esunnan cu ta sufriendo pa aumento di costo di bida.
Ademas, el a enfatisa cu tur impacto financiero cu ta bin experenciando na e momentonan aki ta door di desaroyonan internacional, normalmente ora e situacion financiero di un pais ta bon, por ehemplo, den condicionnan aki e tasa di loonbelasting y inkomstenbelasting ta wordo reduci, pero door di desaroyonan internacional e poder di compra di e comunidad ta bayendo atras, “lamentablemente mirando e situacion financiero di nos pais esey no ta posibel, den pandemia a reduci e tarifanan hustamente pa mehora e poder di compra y te awe, CAft ta exigi pa kita esey back of bin cu otro medidanan pa haya entradanan internacional”.
Tambe, minister Wever a comenta cu tabatin un ‘crisis pakket’ tempo cu pandemia Covid-19 a drenta Aruba, pa e motibo ey a puntra conseho na diferente departamentonan si ta amplia e canasta basico of ta mantene igual unda cu tanto De Sociaal Economische Raad (SER) como Directie Volksgezondheid (DVG) a dicidi di scoge e cinco productonan aki den cual tabatin diferente discusion pa e productonan, como corn fleaks ta un producto cu ta wordo usa pa hopi famianan nan a dicidi di inclui esaki den e lista cu e idea di yuda nan cu ta den necesidad.
Pa loke ta trata e pan, cu cierto companianan cu ta produci esey a dicidi di aumenta e prijs di e kipashi, minister Wever a enfatisa cu e producto aki ta cay den e areglo di maximo prijs pero cu basicamente no ta wordo traha mas, aworaki mirando aumento di prijsnan a cuminsa a bin cu e pensamento pa tambe inclui e pan bruin regular bou e canasta basico pa motibo cu pan blanco no tin nutricion, manera minister Wever mes a sigura.
