(AP) — Prome minister Canades, Justin Trudeau a bisa diahuebs cu e ta reestableciendo un comite special di Gabinete riba relacionnan Canada-Merca pa atende e preocupacionnan di su administracion tocante otro presidencia di Donald Trump.
Vice-prome minister Chrystia Freeland, kende tambe ta minister di Finanzas di e pais, ta bay ta presidente di e comite, cu tambe ta bay inclui otro oficialnan top, incluyendo ministernan di Exterior, Seguridad Publico y Industria.
“Despues di eleccion di presidente Donald Trump pa un di dos termino, e Comite di Gabinete ta bay enfoca riba asuntonan critico Canada-Merca,” oficina di Trudeau a bisa den un declaracion diahuebs.
Canada ta un di e paisnan mas dependiente riba comercio na mundo, y 75 porciento di exportacion di Canada ta bay Merca.
Durante e prome presidencia di Trump, su movida pa renegocia e Acuerdo Nort Americano di Comercio Liber, NAFTA, y reportahenan cu e tabata considerando un tarifa di 25% riba sector di auto a ser considera un menasa existencial na Canada e tempo aya.
Trudeau a yama Trump diaranson pa felicit’e y nan dos a discuti un acuerdo nobo di comercio liber cu Trump a cera durante su prome termino cu Canada y Mexico, e Acuerdo Merca-Mexico-Canada, cu a reemplasa NAFTA.
Ottawa pronto ta bay tin cu enfoca riba un revision programa pa e acuerdo na 2026.
Maske Trump un biaha a yama Trudeau “debil” y “deshonesto” durante su prome termino, lasonan entre e dos pais a keda entre e mas cercanonan na mundo.
Freeland a papia cu reporteronan dos biaha diaranson den un esfuerso pa sigura Canadesnan.
“Mi sa hopi Canades ta ansioso. Mi kier bisa cu completo sinceridad y conviccion na Canadesnan cu Canada ta bay ta absolutamente bon,” Freeland a bisa. “Nos tin un relacion fuerte cu Merca. Nos tin un relacion fuerte cu presidente Trump y su team. Ban recorda cu nos relacion comercial awo ta goberna pa e acuerdo comercial conclui pa presidente Trump mes y su team,” Freeland a bisa.
Durante e campaña recien, Trump a propone tarifanan di 10% te 20% riba productonan di exterior – y den algun discurso a menciona porcentahenan mas halto.
Ademas, segun cifranan di NATO, Canada tabata calcula di ta gastando 1.33% di GDP riba su presupuesto militar na 2023, menos cu e 2% cu paisnan di NATO a pone pa nan mes. Trudeau a bisa cu Canada ta bay cumpli cu e cantidad meta di e aliansa pa 2032. Trump a urgi paisnan di NATO pa reforsa nan propio gasto di defensa pa alivia e peso riba Merca pa disuadi enemigonan di e aliansa.
Gobierno Canades ta nota cu Merca y Canada ta e partnernan comercial mas grandi di otro cu casi $3.6 biyon dollar Canades (US$ 2.7 biyon) den bienes y servicio crusando e frontera cada dia na 2023.
E lasonan entre e dos pais no tin paralel ningun lugar na mundo.
Tin cooperacion cercano riba defensa, seguridad y cumplimento di ley, y un superposicion den cultura, tradicion y pasatempo – cu liganan comparti den baseball, hockey, basketball y futbol. Alrededor di 400mil persona ta crusa e frontera internacional mas largo na mundo cada dia, y como 800mil Canades ta biba na Merca.
