Canada a cera parlamento y a conseha pa hende no biaha fuera di e pais. Prome minister Justin Trudeau a goberna remotamente for di su cas, den un cuarentena boluntario despues cu su esposa a test positivo pa novel coronavirus.
Director di salud publico, Theresa Tam, tambe a conseha mas distancia social, no duna man ni sunchi. Gobierno Canades ta recomenda cancelacion di tur evento grandi, como concierto.
Minister di Transporte, Marc Garneau, a bisa cu crucero cu mas di 500 persona no por atraca na Canada te cu dia 1 juli. Vuelo di exterior cu lo bin bek Canada tambe lo keda restringi na un cantidad chikito di aeropuerto na e pais.
Congreso di Canada a vota pa cera pa 5 siman pa yuda garantisa cu legislado no lo contribui na propagacion di e virus.
E movidanan a bin un dia despues cu esposa di Trudeau a test positivo. E prome minister su mes ta den cuarentena boluntario.
Tur partido den parlamento a bay di acuerdo cu e suspension, nificando cu legisladonan lo perde dos siman di sesion desde cu anteriormente nan a planea pa keda leu otro siman y dos siman na april. Congreso ta programa pa reuni proximo biaha dia 20 di april.
Parti di e acuerdo pa cera parlamento pa cinco siman tabata ratifica e Acuerdo pa Comercio Liber Nort Mericano nobo. Lider di Government House, Pablo Rodriguez, a bisa cu legisladonan a pasa legislacion pa ratifica e acuerdo Merca-Mexico-Canada nobo, y ta spera cu Senado lo sigui diabierna.
Trudeau tabata den cuarentena boluntario na su cas pasobra su esposa, Sophie Gregoire Trudeau a test positivo pa novel coronavirus despues di bolbe for di Reino Uni. El a bisa ayera cu su esposa tin sintoma leve pero ta sintie bon. El a bisa cu ni e ni su tres yiu ta mustrando sintoma.
Trudeau tabata pasando e dia den sesion informativo, yamada y reunion virtual na cas, incluyendo papiando cu otro lidernan mundial y participando den discusion di comite di Gabinete pa coronavirus.
