(AP) — Prome Minister di Canada, Justin Trudeau, a anuncia su renuncia ayera despues di casi un decada na poder, reconociendo e descontento creciente den su liderato y turbulencia creciente den su gobierno, cual a manifesta door di un salida abrupto di su minister di finanzas.
Trudeau, e lider mas recien cu ta ser pusha afo door di descontento creciente di votadornan rond mundo, a bisa cu a bira cla p’e cu e no por “ta lider durante proximo eleccionnan debi na conflictonan interno.” E ta planea pa keda prome minister te ora un lider nobo di Partido Liberal ser eligi.
“Mi no sa give up facilmente den pelea, specialmente uno asina importante pa nos partido y pais. Pero mi ta haci e trabao aki pasobra e interesnan di Canadesnan y bienestar di democracia ta algo cu mi ta stima hopi,” Trudeau a bisa den su anuncio durante un evento pa prensa banda di su residencia oficial.
El a agrega cu e parlamento, cu mester a cuminsa traha dia 27 di januari, lo ser suspendi te dia 24 di maart. Esaki lo duna tempo pa un eleccion den e Partido Liberal.
Tur tres partido di oposicion principal a bisa cu nan ta planea pa kita e Partido Liberal den un voto di desconfiansa ora parlamento cuminsa atrobe, haciendo e posibilidad pa un eleccion den primavera grandi despues cu e Partido Liberal eligi un lider nobo.
“Partido Liberal di Canada ta un institucion importante den historia di nos gran pais y democracia. Un prome minister y lider nobo di Partido Liberal lo carga su balornan y idealnan den e siguiente eleccion,” Trudeau a bisa. “Mi ta emociona pa mira e proceso cana den e luna cu ta bin.”
Trudeau a tuma poder na 2015 despues di 10 aña di gobernacion di Partido Conservador y inicialmente a ser celebra pa trece e pais back na su pasado liberal. Pero e lider di 53 aña, un di e prome ministernan mas famoso di Canada, a bira impopular cu votadornan den e ultimo añanan riba varios tema, incluyendo e costo altisimo di cuminda y vivienda, y emigracion cu ta aumentando.
Den un mensahe cu el a publica riba X, lider conservador Pierre Poilievre a bisa cu Canadesnan “desespera pa bira e pagina riba un capitulo scur den nos historia lo sinti alivia” cu Trudeau ta bay. “Pero kico realmente a cambia? Tur parlamentario di Partido Liberal den poder awe y tur posible nominado pa liderato liberal cu ta purbando di haya e puesto a yuda Justin Trudeau kibra e pais durante e ultimo nuebe aña.”
Otro lidernan di oposicion a agrega nan critica, incluyendo Jagmeet Singh, lider di Partido Democrata Nobo. “No ta importa ken lo ta e proximo lider liberal. Nan a faya boso. Nan no merece un otro oportunidad,” Singh a bisa, ken su partido tabata apoya Partido Liberal pa varios aña.
E presidente di Partido Liberal, Sachit Mehra, a bisa cu miembronan di partido ta “sumamente agradecido” na Trudeau pa e progreso transformacional cu el a entrega pa Canadesnan, incluyendo cuido di mucha pa $10 pa dia, cuido dental y un plan nacional pa clima. Mehra a bisa cu e lo convoca un reunion e siman aki pa cuminsa cu seleccion di un lider nobo.
E problema politico a yega na un momento dificil pa Canada den e escenario internacional. E presidente-electo di Merca, Donald Trump, a menasa pa impone tarifa di 25% riba tur producto di Canada si e gobierno no stop e fluho di migrante y droga cu ta drenta Merca — aunke hopi menos ta crusa di Canada pa Merca compara cu Mexico, cual Trump tambe a menasa.
Canada ta un exportador mayor di petroleo y gas natural pa Merca, cual tambe ta depende riba su bisiña panort pa steel, aluminium y auto.
Despues di e anuncio di Trudeau, Trump, ken pa varios siman a referi na Canada como e di 51 estado Mericano, a ripiti su burlanan y a afirma incorectamente riba red social cu e prome minister a renuncia pasobra Canada ta depende di subsidionan di Merca pa sobrevivi.
Trudeau a keda keto publicamente pa algun siman, a pesar di e presion creciente pa e bay. “Su silencio prolonga despues di e drama politico aki ta bisa hopi tocante e debilidad di su posicion actual,” Daniel Béland, profesor di ciencia di politica na Universidad McGill na Montreal, a bisa.
E ex-minister di finanzas di Canada, Chrystia Freeland, a anuncia su renuncia for di e gabinete di Trudeau dia 16 di december, criticando algun prioridadnan economico di Trudeau den cara di e menasanan di Trump. E movida aki, cual a bin un rato despues cu e minister di vivienda a renuncia, a laga e pais sorprendi y a causa preguntanan tocante con largo e Trudeau impopular por keda den su puesto.
Freeland y Trudeau tabata den desacuerdo tocante dos politica recientemente anuncia: un vakantie temporal riba impuesto di benta pa producto variando for di paña pa cerbes, y plannan pa manda tur ciudadano un cheque di 174 dollar. Freeland, ken tambe tabata vice-prome minister, a bisa cu Canada no por paga pa “politicanan hopi costoso y sin sentido.”
“Nos pais ta enfrentando un desafio grave,” Freeland a skirbi den su carta di renuncia. “Esaki ta nifica pa protega nos recurso fiscal awor, pa nos por tin nan disponible den caso di un guera di tarifa cu ta bin.”
Trudeau tabata planea goberna pa un di cuatro termino a pesar di e descontento den su partido. Prome ministernan na Canada por keda den oficina tanten cu nan gobierno of partido tin confianza di e mayoria den House of Commons, pero ningun prome minister Canades den mas di un siglo a gana cuatro termino consecutivo.
Partido di Trudeau recientemente a perde den eleccionnan special den dos districto na Toronto y Montreal cu nan tabata controla pa hopi aña. Y mirando e encuesta mas recien, su chens pa exito tabata chikito. Den e encuesta di Nanos, Partido Liberal tabata tras di Partido Conservador 47% pa 21%.
Durante su tenura largo, Trudeau a defende un causa cu ta popular entre su base liberal. El a papia den fabor di emigracion durante un tempo cu otro paisnan tabata purba cera nan frontera. El a defende diversidad y igualdad di genero, nombrando un gabinete cu un cantidad igual di hende homber y muhe. Y el a legalisa cannabis.
Su esfuersonan pa alcansa un balansa entre crecemento economico y proteccion ambiental a haya critica pa tanto e banda derechista cu banda iskierdista. El a impone un impuesto riba emision di carbon y a rescata un proyecto di expansion di pipeline cu tabata para pa trece mas petroleo di Alberta na e mercado internacional.
Menos hende a muri di COVID-19 na Canada compara cu otro lugarnan, y su gobierno a duna sosten financiero masivo. Pero odio a crece entre esnan cu tabata contra mandatonan pa vacuna. Bandera cu e nomber di Trudeau y groserianan a bira un bista comun den regionnan rural.
Cu tempo, un combinacion di scandalnan y politicanan impopular a daña su posibilidad pa reeleccion.
