Karin Bosman, e fundado di About Workplace Harassment (AWH) cu a cuminsa cu su investigacion na Aruba riba molester sexual, lo cana di New York pa Washington DC na december. Su meta final: un combersacion cu presidente Donald Trump.
Na augustus Bon Dia a publica un articulo cu sexual harassment na Aruba no ta haya e atencion manera priminti tambe for di banda di gobierno. E reaccionnan riba su investigacion inicialmente tabata positivo, como cu a resulta cu 37% di e populacion laboral (16.000 hende) ta sufri for di e molester aki frecuentemente na trabou.
Pa haya mas atencion pa e topico aki, sra. Bosman a planea su caminata di 313 miles cuminsando riba 1 di december cu intencion pa papia cu presidente Trump riba 14 di december. E kier crea mas conscientisacion di molester sexual den educacion. Como cu esaki tambe ta un problema creciendo. Mientrastanto na Merca por ehempel nan a corta den e presupuesto pa crea mas conscientisacion.
“Nos mester hisa e presupuesto como cu tecnologia nobo y falta di privacidad digital netamente ta rekeri cu mester mas atencion y maneho di prevencion”, asina sra. Bosman ta splica. Nos a puntr’e dicon e ta cana na Merca. “Pasobra mi ta sinti cu mester atencion mundial pa e topico aki, cu ta infiltra den cada scol, universidad y finalmente trabou. Nos mester traha hunto, muhe y homber.”
Sra. Bosman tambe ta busca manera ainda pa haya e topico aki riba agenda politico di Aruba. Na Corsou el a logra si pa convence gobierno pa tuma cierto accion. Despues di e investigacionnan riba e dos isla, ta conclui cu mas cu 85% di e populacion laboral no ta sinti nan mes sigur na trabou. Y cu 71% no sa si nan compania/organisacion tin un maneho contra molester. “Nos mester stop di pensa cu esaki ta algo parti di nos cultura.”
