Leoni Brokke ta un hoben Arubiano cu a haya su mes den un accidente hopi serio y a keda cu dañonan unda cu awe su famia ta haciendo tur lo posibel pa duna e tratamento cu e merece pa asina e progresa mas cu ta posibel. Bon Dia Aruba a tuma contacto cu su famia pa asina splica nos mas.
Nos a haya contacto cu Amber Brokke kende ta ruman di Leoni. E ta conta tur locual nan a y ta pasando aden pa asina Leoni por progresa.
E accident a pasa aña pasa dia 16 di september unda cu Leoni tabata ariba un brommer cual ta algo cu e tabata gusta haci. Un auto lo a sali su dilanti pero Leoni no a logra pa kita lihe suficiente eynan Leoni a dal den e auto y a haya un impacto serio na su cabes ora cu el a cay ariba vloer. Esaki a resulta cu el a bay de un coma di biaha. Esun cu a tuma contacto tabata e hefe di Leoni cu a yama e pareha pa contact e famia di Leoni pa bisa nan kico a pasa. Dokternan a bisa na hospital cu no ta mira mucho speransa y ta dun’e solamente 24 ora pa wak si e lo logra. Sr. Leoni a keda den intensive care 3 siman y te cu december 2016 den coma unda cu poco poco el a sali for di esey.
E opcion cu dokternan a duna ta sea manda Leoni na SABA of pa e bay cas y keda den coma paso nan nunca a pensa cu Leoni lo lanta segun sra. Brokke ta bisa.
Casi a muri na hospital
Sra. Brokke ta conta nos di e dia cu dokternan a saca Leoni for di intensive care unda cu e no tabata cla ainda pa por wordo manda den otro camber pasobra cu e curpa tabata hopi zwak ainda. Ariba e dia ey e famia lo a bay cas pa refresca y bin bek hospital. Na momento cu a yega bek nan por a mira cu Leoni tabata haci straño y tabata hala rosea pisa. Segun sra. Brokke enfermeronan a tarda pa bin asisti. Ora cu nan a yega por a mira cu Leoni tabata pegando cu su mesun slijm pasobra cu nan no a zuig esaki na ora e dia ey. Despues a warda doctor bin yuda cu segun sra. Brokke a tarda casi un ora pa yega, asina mester a yega na e punto cu mester a reanima.
Leoni a keda algun siman mas mientras tanto cu famianan ta busca manera y puntra si por mand’e Colombia pero nada. Su mama a contact un neurologo y el a bay wak e scannan di Leoni, cual segun sra. Brokke e famia a wordo nenga di haya esakinan. Pasobra cu dokternan so por wak e scan, nan a bisa, y cu si famia kier busca un otro opinion, famia lo mester duna tur informacion di e otro doctor. Pa asina nan por dicidi si lo entrega e scan cu nan pidi. Asina ta cu famia mester a paga 75 florin pa por haya nan.
AZV no ta cubri tratamento
Sra. Brokke ta bisa nos cu AZV no a cubri gasto pa manda Leoni afo, pasobra nan a indica cu nan no ta paga pa casonan di accident. Asina ta cu famia mes a cera placa pa por manda Leoni. A logra busca un opcion pa haya un Air Ambulance mas barata posibel pa por hiba Leoni Colombia na october.
Ya cu na e accidente e señora den e auto tabata fout, Leoni a haya placa di e seguro di e señora. Pero nan a haya solamente un tercera parti di e placa aki cual a yuda un paga algun cos na Colombia. E speransa di e famia ta cu e placa aki lo yuda nan na Colombia. Pero hospital na Aruba a keda cu e otro parti di e placa di seguro pasobra nan a manda e famia un recibo di 110 mil florin segun sra. Brokke. Maske cu Leoni ta sigura na AZV. Famianan a pidi director di AZV pa wak si por a duna un carta di despensatie pa por laga e famia liber di e gastonan di hospital. Sin embargo nan a wordo nenga.
Sra . Brokke ta bisa cu e ultimo luna cu nan a ricibi placa for di seguro tabata na januari, y despues na februari e reunion cu e director di AZV a tuma luga. Unda cu nan a wordo bisa cu si Leoni bin Aruba su opcionnan ta un biaha mas, SABA y cierto sesionnan di terapia y nan por wak di eynan si por hib’e Curaçao pero, esey no ta sigur. E famia a bay cu informacion den e reunion pa mustra director di AZV esta Anko Ringeling, e medische adviseur kende ta Corina Ponson y e abogado di AZV kende ta Cristina Rademaker, con Leoni ta progresando na Colombia. Pero segun sra. Brokke nan a ignora e informacion aki.
Leoni ta actualmente na Colombia hayando 8 pa 9 ora di terapia pa dia, 120 mas o menos ora pa luna di terapia compara cu solamente 10 minuut cada 2 siman di terapia aki na Aruba. Segun famia di Leoni tur esaki ta e motibo cu nan ta bende cuminda, rifa y awor 23 di juli lo organisa un caminata pa recauda fondo pa financia su tratamento.
Bon Dia Aruba lo tuma contacto tambe cu hospital y AZV pa nan comentario riba e caso aki.
