Conseho Nacional pa Defensa di tera, lago y soberania, cu ta conforma pa campesino, a convoca pa un marcha nacional na Nicaragua, pa dia 22 di april contra e proyecto cu ta busca construccion di un canal Inter- Oceanico na e pais aki.
E mobilisacion nacional lo ser realisa na municipio di Juigalpa, na departamento di Chontales, na 140 kilometer di e capital Managua. Organisadornan ta spera cu miles di Nicaraguense lo participa, den su mayoria campesino, lider di e conseho Francisca Ramirez a splica.
“Un biaha mas nos ta bisa cu hende campesino no lo haci un paso atras, y cu nos ta prepara pa muri pa nos tera”, e dirigente a bisa. E grupo ta contra e proyecto di e firma Chines HKND Group, cu ta e empresa cu tin concesion di e proyecto ey, cu e argumento cu lo saca hende campesino di nan tereno cu ta situa riba ruta di e canal, y nan ta opone tambe pasobra e proyecto ey ta destrui tur ecosistema na sur di Nicaragua.
Ramirez a hustifica e lucha di campesino pa no permiti cu e empresa Chines por tuma nan tera y asina destrui e ecosistema. E conseho a tene 85 marcha local contra e proyecto di canal, y 5 marcha nacional, caminda a participa miles di campesino. Nicaragua a duna HKND Group e derecho di tene e canal pa un periodo di 50 aña, cu posibilidad di haya 50 aña mas di proroga.
