Campeon Aruba Pool Tour-A 2021; Jorzinho Everon Billiard ta mi deporte y hobby

Jorzinho Everon no ta un persona desconoci den e deporte di Billiard aki na Aruba pero tambe na Venezuela, Peru, Boneiro y Corsou. Jorzinho ultimo su team tabata baracuda. E campeonato di Aruba Pool Tournament 2021 di 9-Ball tabata e ultimo campeonato cu a tuma luga na Ten Ten Billiard na Tankileendert y e la dura 6 luna mirando cu ta un bes pa luna ta ser hunga.

E wega ta bay abase di punto y tambe con bunita bo por domina e bala di billiard y hinca mas bala cu ta posibel aden cu un bunita calculacion. Jorzinho a lanta den su famia cu e deporte aki , su tata y mama ta hunga billiard , pero tambe su omo. Sinembargo tempo cu e tabata hoben e no por a hunga e deporte aki, pero asina cu e la haci su 17 aña e la drenta hunto cu e famia y asina a namora di e deporte y a tume mas na serio te cu dia di awe ta hunga billiard y ta participa tambe den diferente campeonatonan na Aruba y den exterior.

Prome cu aña a caba Jorzinho a hunga cu tur e top hungado nan di billiard y a sali e campeon y a cera aña cu su copa ganando tur e grandinan den billiard na Aruba. Banda di e Tournament A tambe tabatin e tournament B cu Wilfred Tromp a sali Campeon di dje.

Un total di 30 hungado tabata competi. E resultado nan di categoria A tabata 1.Jorzinho Everon,2.Jorge Petrochi,3.Jason Kock,4.Roukos Tanoury. Resultado Categoria B,1.Wilfred Tromp,2.Maikel Maduro,3.Edwin Chirino,4.Ryan Kock. Segun Jorzinho e deporte di billiard hopi biaha ta wordo mira un deporte di bar , pero den su concepto esaki no ta asina. E deporte di billiard ta trata di hopi disciplina, berdad cu tin hopi alcohol ta circula rond pero e mes como deportista no ta bebe y nunca e alcohol no a influencia su deporte cu e ta gusta. Esaki lo mester por bao di e otro hobennan tambe.

Loke ta importante pa Jorzinho ta cu e siguiente generacion sigui cu e deporte mirando cu no tin mucho hoben cu ta interesa den e deporte aki y nan mes ya caba mayoria ta hende nan grandi. Aki na Aruba ta ser hunga tres tipo di tournament 8-Ball, 9-Ball y 10-Ball. Pa Jorzinho un di su competencianan mas grandi mes ta su mes un primo Jason Kock cu tambe ta un di e duro nan den e wega aki, pero tambe e presidente Gunnar leonardo y Richard Wolf cu ta esunnan cu mas Jorzinho ta haya dolor dolor di cabes pa por surpasa nan. Pa e hobennan cu ta interesa pa siña mas di e deporte di billiard por yama 5644278 y lo haya mas informacion con por cuminsa cu e deporte di billiard.