Campaña ta temporada di…. Promesa sin compromiso…

Mientras tabata circula algun rumor tocante usurpacion di cartera di e ministronan di e junior partner den e coalicion, den conferencia di prensa promer ministro a apacigua e inquietudnan ey, declarando cu no tin ningun tipo di ’take-over’ di cartera di ministro. Esey ta parce nos logico tambe ya cu e problema cu a conduci na caida di gobierno no tabata den gobierno, sino den parlamento y e posicion di partidonan di coalicion den e confrontacion. Naturalmente tur esaki ta bin hunto cerca e persona di promer ministro cu ta tambe lider di partido, y e persona cu finalmente mester a carga e decision di bay entrega retiro cerca Gobernador. Laga nos spera cu cada ministro en berdad keda eherce nan responsabilidadnan manera mester ta y atende tur asunto cu ta apto pa maneha y implementa den e periodo demisionario aki.

Cu esey tur posible problema a keda kita for di caminda? No, pero lo ta logico cu, mientras tur hende ta den campaña electoral, no ta surgi diferencia di opinion tocante cierto proyecto o plan, pasobra e ora lo mester scoge pa para esaki, pasobra no ta factible implementa esaki bao di e titulo di ‘asunto coriente’ (‘lopende zaken’). Lo mester laga esaki pa e siguiente gabinete, a menos cu consulta cu parlamento y haya aprobacion pa ehecuta di cierto manera cu pa tur e ministerionan envolvi ta aceptable. Pero, lo puntra tambe: lo tin caso asina unda ministerio(nan) ta den desacuerdo tocante implementacion? Sigur cu si y no ta trata solamente di trabao o asunto cu ta toca un ministerio directamente. Nos a mira caba cu un asunto manera e pleito cu e taxistanan, cu ta regarda un solo ministro, a conduci na metemento di varios otro mandatario, hasta declarando publicamente contra nan colega di coalicion pa su maneho, y pakico? Pasobra el a toca interes politico di e partner di coalicion cu lo semper defende cualkier grupo cu tin relacion fuerte cu nan partido. Y kico ta e resultado di e metemento aki? Cu ta yega na un acuerdo intermedio cu no ta resolve e problema di un manera contundente, cu no ta satisface esun cu lo desea cu e profesion di taxista ta habri pa tur ciudadano y mas bien tin tendencia di continua e politica di faboritismo pa calma nervio di e famianan taxista cu ta desea proteccion di un supuesto ‘derecho’, mucho menos eterno, cu nan tin pa prolonga permiso den famia. E derecho ey no ta existi den e ley di transporte publico, loke si ta existi ta e posibilidad di reemplazo temporal di esun familiar cu tin e permiso.

Algo similar lo por sucede proximamente atrobe. Recientemente e dos mandatarionan di e junior partner a anuncia un proyecto di mehoracion pa San Nicolas. Aunke ta parce cu a primera vista tur cos ta OK pa nan dal bay cu e proyecto, por kere cu meymey di un campaña electoral no ta bin un reaccion di e partner mayoritario, pa defende su base di apoyo den un parti asina importante di nos isla? Si, nos sa cu San Nicolas ta solamente importante den campaña, pero ta net den esey nos ta awor… Tur e tempo no a sucede mucho den e lugar aki, pero awor de repente cada partido ta bin trece su propio promesa pa drecha e lugar. Asina nos ta mira e ‘comeback’ di e proyecto di fast ferry pa conecta nos cu e bisiñanan insular mas cerca, cu pa nos nunca a haya e contesta corecto riba e preguntanan clave. Manera e inquietud si lo tin suficiente volumen di hende y mercancia pa hustifica un proyecto asina. Nos a tuma nota cu e parti di carga lo ta insuficiente, pero cu e parti di persona y nan vehiculo si lo ta viable. Sin embargo, no a aparece ningun dato o cifra di credibilidad y por lo tanto, por lo pronto, esaki ta keda un interogante grandi. Lo ta bon si esunnan cu ta campaña cu e asunto aki duna mas informacion concreto, sino esaki tambe ta bay bunita asina den nos ‘vitrina di ilusion politico’, cu ta hopi yen caba…

Otro parti inevitable di desaroyo di San Nicolas ta e tereno di refineria y kico lo ta bay tuma lugar, of no, riba e area extenso aki. E actual ministro encarga cu asunto di energia a yega na propone un serie di alternativa pa e refineria, di cual ningun na e momento aki ta indica algun grado di probabilidad. Nos ta cuminza tende e promer sonidonan di aceptacion cu rehabilitacion di e refineria, den e mundo aki, ta imposible. Ademas e otro propuestanan, di gas natural y hidrogeno, tambe a keda na mero anuncio di ‘loke lo bay haci’. Ora nos no solamente scucha e propaganda di esnan interesa den propaganda, pero ta dispuesto di informa nos mes con negoshi internacional riba e terenonan aki ta anda, nos por conclui cu no tin perspectiva faborable pa e sectornan aki na Aruba.

Tin tambe un plan pa reactiva e centro comercial di San Nicolas. Nos lo apoya cualkier plan pa San Nicolas cu ta demostra realismo, tumando na cuenta con dificil ta pa establece negoshi, si no tin un plan serio di concentracion y aumento di poder di compra cu mester yuda lanta esaki atrobe. Trece mas turista, den un hotel ‘all inclusive’ ta solamente un inicio timido, cu ademas no ta atende e problemanan proximo di escasez di vivienda, un problema existente caba. Nos no ta mira contesta contundente pa esaki, pero ya, esey ta campaña…