Campaña sterilisa cacho: “Nos no a spera tanto hende bin asina”

Awe ta e ultimo dia di e proyecto operacion cunucu y locual cu Bon Dia Aruba a ricibi manera cu a drenta pa haci entrevista, ta caranan contento y personanan super amabel pa conta con e dianan a bay. For di informacion cu nos a ricibi por bisa cu tabatin hopi trabou y falta hopi trabou mas pa haci pa logra yega na e punto cu cacho tin miho cuido y e problema di cacho riba caya ta bou di control.

Mercedes de Bruin a splica Bon Dia cu basicamente a traha un clinica portatil cu Animal Balance esaki a wordo haci pa dia. Ta operando cu 3 veterinario y nan team tecnico. Banda di esaki, despues cu e cachonan sali for di operacion tin e seccion di “recovery 1” y “recovery 2”, pues ta duna e cachonan un bon cuido despues di nan operacion tambe. E diferente seccionnan aki ta unda cu e cachonan ta caba si sali for di nan anestesia y ta wordo lanta te ora cu nan por para y cana bek, pa despues nan bay bek den nan haula. E haulanan tambe ta poni segun seccion manera por ehempel e seccion di cachonan cu mester bay bek San Nicolas, of esunnan cu ta wordo busca na Dakota.

A puntra Sra. Mercedes kico ta su rol den e proyecto aki, pues el a splica cu na luna di januari nan a start cu United Dogs Aruba. E mes ta Hulandes y e resto di e miembronan ta di Aruba y e grupo tin algun di nan ta biba na Hulanda y otro na Aruba. Mita aña pasa a rescata varios cacho y a conoce e situacion riba e isla cu tur hende cu ta biba aki y con e conscientisacion ta. Segun Sra. Mercedes por mehora hopi riba e area di conscientisacion, special pa yuda cu e cachonan cu tin riba caya. pues basicamente mester maneha e populacion di cacho. E problema di pushi riba caya tambe ta grandi pero esaki ta algo cu lo atende cun’e despues. Na momento cu Bon dia Aruba a yega pa haci e entrevista net un pareha a yega pa trece un pushi, pero mester a bisa nan cu e proyecto ta solamente pa cacho e biaha aki.  “Nos no a spera tanto hende bin asina, hende ta yega cada dia mas trempan, nan ta yega for di 6or y mey, warda te 8or pa e luga habri cuminsa tuma cacho.”  Awe diasabra ta ultimo dia cu ta sterilisa e cachonan.