Campaña Paws Uni pa sterilisa mascota den diferente bario

Recientemente Luna Foundation Aruba a anuncia cu pronto nan lo cuminsa cu e campaña Paws Uni, un campaña nobo cu lo enfoca den sterilisa e mascotanan den diferente bario di Aruba. Den un entrevista cu Bon Dia Aruba, Zoey Konijn di Luna Foundation a elabora ariba kico e campaña aki ta encera y e meta di e campaña.

Konijn a splica cu Paws Uni ta consisti di 11 fundacion cu a uni hunto cu veterinario VSH y Stimami Sterilisami pa bay bario pa bario pa sterilisa e mascotanan. Esaki, el a remarca ta pa no mester keda trece veterinarionan di afo pa soluciona Aruba su problema.

“Nos tin veterinario aki na Aruba cu por mesun cos, dus en bes di trece hende di afo pa soluciona nos problema, dicon nos mes no ta hacie y VSH ta un di e veterinarionan cu a gusta e idea,” el a indica.

El a sigui splica cu e idea ta pa drenta den e barionan y e prome bario lo ta Madiki y campañan ta cuminsa e prome weekend di augustus. Konijn a indica cu e idea no ta bay pa e cantidad si no riba calidad. Esaki ta nifica cu nan no ta enfoca riba cuanto bario nan por haci den un corto periodo di tempo, e campaña ta keda den e bario ey te ora cu nan ta sigur cu tur mascota a wordo opera y cu nan ta sigur na nan cas.

E fundacionnan ta drenta den e bario, den e casnan pa opera e mascotanan y nan ta drenta pa papia cu e doñonan, educa nan y pa traha casnan di cacho unda mester, zorg pa e cacho ta bon mara y zorg pa e pushinan no ta den sushedad.

“E ta full un proyecto pa ora nos sali di e bario ey, e bario ey ta haya e stempel cu tur mascota eyden ta sigur, ta okay, ta opera y ta bon cuida,” Konijn a enfatisa.

Despues cu nan ta sigur cu e mascotanan ta sigur y opera, nan ta bay den otro bario. E no ta specificamente cu luna di augustus nan ta den Madiki y pa luna di september nan ta den otro bario. “Nos no por bisa esey di awo. Ora nos drenta Madiki nos por wak ki ta pasando, cuanto tempo lo mester y nos ta tuma nos tempo,” el a agrega.

Konijn a splica cu e meta ta pa haciele tur weekend, diasabra y diadomingo, pasobra e ora ey e hendenan ta na cas. E veterinario ta drenta e bario, e doñonan ta bin VSH. Nan ta setup den e bario den weekend pa haciele mas facil pa e doñonan por bin si nan tin pregunta, si nan mester di Nextguard of si nan mester di vacuna, lo tin tur cos disponibel pa nan.

E campaña tin un gasto, el a indica, y pa esaki e fundacion ta bay cuminsa e siman aki cu recaudacion di fondo. Ademas Stimami Sterilisami ta yudando cu fondo tambe, nan ta bezig ta wak si gobierno lo kier ta parti di e campaña y VSH ta haci donacion, pues nan no ta cobra pa nan servicio.

“Nos ta recaudando fondo pa paga e remedinan, eNextguard y tur loke nan mester pa por opera, esey nos tin cu cubri,” el a indica.

E meta di e campaña di Paws Uni, Konijn a conta, ta pa Aruba mes resolve e problema, pa bay den e barionan y splica e doñonan ariba e cuido di mascota.

“Bo por keda opera te ora bo cay flauw pero si bo no cambia e manera di pensa di nos hendenan, bo nunca lo stop di opera pasobra nan nunca lo compronde pakico nan tin cu sterilisa nan bestianan. Esey ta e meta,” el a enfatisa.

El a sigui splica cu nan ta drenta e bario prome cu augustus pa combersa cu e hendenan den e bario, tur weekend of den siman. Nan ta bay forma un ekipo di caya cu lo drenta pa wak si nan tin cachonan cu tin carpata y e ora ta duna nan un Nextguard y antibiotica di biaha pa ora ta tempo pa opera e mascota nan sa cu nan ta saludable cu nan por wordo opera.

E idea aki ta un soño di Konijn for di hopi tempo caba. El a conta cu for di su punto di bista e barionan cu tin e hendenan menos afortuna, cu no tin e recurso pa hiba nan mascota veterinario, ta esunnan cu mas mester ayudo.

“Door cu Luna Foundation ta drenta e barionan y mi ta wak nos pueblo ta sufriendo. E no ta manera cu tin nan ta haciele pa malo, ta djis nan no sa, tin di nan no ta worry. Ora bo bay papia cu nan un pa un y bo splica nan y bisa nan cu e ta un operacion full gratis pa nan unico cos cu nan mester haci ta duna e permiso pa drenta cura y yuda nan y hunto cu nan drecha e luga pa nan mascota ta sigur, si no tin un bon luga pe,” el a splica.

El a enfatisa cu maramento cu cadena na nek nan no kier mas y door di esey nan ta bezig ta recauda fondo pa cumpra harnass y halsback netjes duradero pa no tin cu mara e bestianan cu cadena na garganta den solo, sin baki di awa, sin cas.

“Nos kier haci full e pakete, no enfoca solamente riba opera. Bo no por opera y hink’e back den e fierno di unda bo a sake. Bo opere e tin cu bay back y biba un bida leuk,” Konijn a remarca.

Pa esaki, el a splica cu ta bay tin mester di hopi boluntario. Pa e ekipo di caya ta bay tin mester alrededor di 10 pa 15 hende y pa e campaña di sterilisacion tin mester minimo 20 hende. Door cu ta weekend ta spera cu ta kere esey ta haciele un tiki mas facil, pasobra hopi hende kier yuda pero den siman no por.

E ta algo pa Aruba. E ta pa nos mustra e mundo tambe cu no tur di nos ta maltrata nos bestia. Tin un par di nan eyfo cu ta daña nomber di nos isla, pero awor nos por mustra mundo tambe cu nos tin amor pa nos mascotanan.