Campaña “Orange the World”: 16 dia di activismo pa conscientisa pueblo ariba violencia contra hende- y mucha muhe

Ayera mainta durante un conferencia di prensa Fundacion Contra Violencia Relacional (FCVR), conhuntamente cu Centro di Desaroyo di Hende Muhe (CEDEHM), HIAS y UNHCR a anuncia e campaña “Orange the World” cu ta enfoca ariba conscientisacion di violencia contra hende muhe y cu lo ta cuminsando diasabra 25 di november.

Rish-Ann Ammerlaan, trahado social na FCVR , a anuncia cu despues di participa pa varios aña cu e campaña mundial aki, e aña aki un biaha mas nan lo ta participando den e campaña cu lo cuminsa dia 25 di november te cu 10 di december.

Durante e 16 dia di activismo aki FCVR conhuntamente cu otro fundacionnan, entre otro HIAS, UNHCR y CEDEHM, ta organisa diferente actividad pa crea consciencia ariba e tema di violencia contra hende muhe y mucha muhe.

Ammerlaan a splica cu e aña aki FCVR ta uni na e tema di Orange the World di Hulanda cu ta ‘Seguridad tur caminda y tur ora’. El a sigui splica cu FCVR a sinta cu diferente organisacion pa asina crea un agenda cu diferente actividad cu lo enfoca ariba e parti di conscientisacion.

“Di parti di FCVR nos a crea entre otro tayernan hunto cu CMMA conhuntamente cu Futura pa muchanan muhe entre 12 pa 18 aña di edad na diferente MFA rond di Aruba, tin tambe tayer hunto cu Centro Desaroyo Humano y tin tambe actividad di Stimami Guiami cu ta specialmente pa e mamanan cu ta cliente di nos cu tin yiu entre dos aña y mey pa cuater aña cu ta pa yuda crea y stimula e vinculo entre mama cu yiu,” el a indica.

Pa e personanan den comunidad cu kier demostra cu nan tambe ta contra abuso di hende muhe y mucha muhe, nan por sende sea nan cas, negoshi of fundacion na color oranje, cual ta e color cu ta representa e campaña.

El a agrega cu e siman aki FCVR ta lansa e prome capitulo di un serie di video caminda cu ta entrevista diferente hende den comunidad pa wak con e seguridad di hende muhe ta aki na Aruba.

Pa loke ta e cifranan di casonan di violencia relacional pa e aña aki, Ammerlaan a splica cu te cu aworaki FCVR tin un cantidad di riba 100 cliente ambulante, cual ta e clientenan cu ta yega na e fundacion y esey ta sin conta e cliente- of casonan cu no ta yega na e fundacion.

“Mirando cu nos ta un fundacion cu ta traha a base boluntario, pero por bisa cu e casonan ta aumenta, pero e banda positivo di esaki ta cu esey ta nifica cu mas hende ta durf di bin dilanti y busca ayudo. E edad di e casonan ta varia, pero esun di mas hoben ta di entre 17 pa 18 aña te na un edad di 60+ cu ta pasa den e situacionnan aki,” el a señala.

Pa loke ta e resultado di e campaña aki di conscientisacion, el a remarca cu e alcance den comunidad ta mas y e fundacion mes ta mas eyfo, loke ta nifica cu mas hende ta scucha y wak cu tin un solucion y tin ayudo profesional. “Nos ta haya cu e hendenan ta reach out mas y tambe cada aña bo ta tende cu mas hende ta conoce e campaña tambe,” el a resalta.

El a agrega cu pa e motibo ey e aña aki e fundacion ta bay den full un otro area pasobra, segun el a splica, hopi biaha e campaña ta keda den e area social of e mesun hendenan ta keda tende di esaki. E aña aki FCVR ta bay enfoca pa trece informacion na entrepreneurnan na Aruba di diferente otro compania cu no ta di e area social pa asina nan tambe tin conocemento y informacion riba e tema aki.

E aña aki CEDEHM tambe a uni hunto cu e otro organisacionnan pa participa den e campaña ‘Orange the World’. Sra. Miangela Ras, directora di CEDEHM a splica cu e angulo di CEDEHM semper ta igualdad y equidad di e hende muhe y mucha muhe de e comunidad. El a enfatisa cu estudio tras estudio ta mustra cu caminda tin mas igualdad y equidad tin menos violencia domestico.

El a remarca cu ta hopi importante pa aworaki cu a logra di tin un nacional gender policy y su implementacion, pa para keto na esaki y pa bin cu proyectonan pa e comunidad pa asina aborda problematica aki. El a señala cu violencia di genero no ta un problema di Aruba so, pero e ta uno mundial y mester di dialogo pa cuminsa compronde e problema aki.

“Ora cu nos papia di igualdad y equidad e ta un dialogo cu tin cu cuminsa pa hende cuminsa compronde e tema di violencia di genero y pakico e ta importante pa gender roles ta bon defini y bon comprendi den nos comunidad. CEDEHM e aña aki hunto cu UNHCR y HIAS ta bay lansa un serie di poster cu ta bay cuminsa dia 19 di november te cu dia 10 di december. Nan ta posternan specificamente pa conscientisa pueblo y pa promove e dialogo,” Ras a indica.

El a añadi cu nan ta midi e adelanto den concretisacion di violencia di genero den e dialogo nacional cu ta cuminsa tuma luga tocante e tematica aki. El a resalta cu e pueblo mester cuminsa papia di igualdad di genero, equidad di genero, kico ta e diferencia entre igualdad y equidad. “E ta hopi importante pa nos tuma esaki como e fundeshi di prevencion di violencia di genero,” el a subraya.

Manouck Wagner, assistent di proteccion di UNHCR tambe a subraya cu violencia basa riba genero ta un menasa di bida y un violacion di derechonan humano cu ta afecta hende muhe y mucha muhe di manera desproporcional. El a indica cu tin estimacion cu un di cada tres hende muhe na mundo ta sinti e impacto di e problema aki.

El a señala cu segun un informe global, e pandemia di COVID-19, conflictonan y cambio climatico a intensifica violencia basa riba genero, agudisando e retonan existente y causando menasanan nobo y emergente.

“Inseguridad economico, interupcion den sustento y limitacion di proteccion social ta sigui aumenta vulnerabilidad di hende muhe y mucha muhe na violencia. Experiencia violencia basa riba genero tin consecuencianan dañino pa bienestar fisico y social di muhenan na tur etapa di nan bida impactando nan desaroyo profesional y empoderamento economico,” el a remarca.

Den cuadro cu e 16 dianan di activismo di e campaña di “Orange the World”, Wagner a anuncia cu dia 25 di november ta bay tuma luga e marcha di “Orange the World” cu lo ta saliendo for di Corte di Aruba pa 5or di atardi y lo termina na Parlamento di Aruba pa 6:30 na unda lo duna inicio oficial na e 16 dianan di activismo cu sendemento di edificio di Parlamento na color oranje.

Por ultimo, Juliene Duran, senior gender-based violance officer na HIAS Aruba, a agrega cu e tematica di e aña aki di UN Women, inversion den e problematica di violencia contra hende muhe y mucha muhe, ta uno hopi poderoso. El a splica cu esaki ta significa cu mester inverti den sensibilisacion y conscientisacion den e problematica di violencia contra hende muhe y mucha muhe y sin laga afo mucha homber y hende homber.

“Den e 16 dianan di activismo aki y e tematica aki mi ta kere ta hopi importante pa nos comunidad uni man. Ban uni nos tur pa asina nos ta e voz di esnan silencia. Nos semper tin cu ta consciente y nos tin cu sinti loke ta e problematica y e ora nos por pasa na e parti di educa nos mes y conscientisa nos mes tocante e problematica pa asina nos por brinda cambio den nos comunidad y traha riba e areanan di prevencion y mitigacion di riesgo pa loke ta trata violencia di hende muhe y mucha muhe den nos comunidad,” el a finalisa.