Dia 27 di december awor benta di klapchi ta cuminsa oficialmente. DVG ta bin cu un serie di recomendacion pa evita incidente lamentabel. DVG ta miembro di e comision di vuurwerk representa pa Jurette Croes-Maduro kende ta Health Promotion di departamento di Salud Publico, caminda nan a percura pa evita casonan di accidente pa mal uzo di klapchi.
El a bisa cu DVG su tarea den e comision di vuurwerk ta pa conscientisa comunidad riba e peliger di klapchi. Pero tambe educa nos comunidad y duna nan tipnan valioso con nan mester cende klapchi di un manera sigur pa evita accidente.
Siguridad
Comision di vuurwerk ta traha riba siguridad di klapchi for di cu e container ta yega te ora cu e ta yega na e consumidor. A base di nan experiencia, nan ta bin cu un serie di conseho pa evita incidente, y asina termina un aña contento sin niun caso di accidente cu klapchi.
E comision ta monitor e klapchinan constantemente riba nan siguridad. Ya caba nan ta riba caya pa controla e container cu ta bay bende klapchi. Si un incidente ta tuma luga cu klapchi, DVG ta wordo informa di biaha pa nan tuma e medidanan di siguridad pa wak si e tabata un problema di e klapchi of un fout humano. Si ta trata di un defecto di e klapchi, e producto aki ta wordo retira mesora pa preveni cu mas accidente por sosode.
E causa di accidente cu klapchi ta debi basicamente na dos factor. Un di nan ta cu e persona a cende e klapchi na un manera iresponsabel pero tambe a yega di pasa cu nan ta haya klapchi cu ta cende mucho lihe, ya sea cu e mecha ta mucho cortico of tin polvo cu ta cende mucho lihe tambe. Si nan ta haya un of dos accidente cu e mesun klapchi, esaki ta wordo raporta na e comision pa piki tur di biaha.
Cada dos aña e comision aki caminda DVG ta forma parti di dje ta lansa un campaña nobo. E aña aki nan a bin cu e campaña cu ta encera e tipnan di siguridad. Riba e container lo tin e posternan y cada persona cu ta cumpra klapchi lo haya e poster aki, pero den un forma di un pamfleta. Nan ta conseha pa tur hende lesa e tipnan y principalmente pone nan den practica.
Tipnan di siguridad
Un punto cu el a trece dilanti ta cu e cliente of consumidor mester ta critico riba e klapchi cu bo ta cumpra. E klapchi no mas di ta 2 aña bieu y ta importante pa bo controla e fecha riba dje cu mester ta 2017 y 2018, no mag di ta mas bieu cu esaki.
Sra. Croes-Maduro a bisa cu como mayor bo mester ta ehempel pa bo yiu. P’esey no cende klapchi si bo ta bou di influencia di alcohol. Den pasado na Aruba nos a yega di conoce accidente di indole hopi grave. Pero danki na e instalacion di e comision aki e cantidad di caso asina a baha considerablemente. Tambe e indole di gravedad di accidente cu klapchi a baha hopi mes.
Ta bon cu prome cu bo ta cende, controla e klapchi tambe pa wak si e tin daño cu ne. Klapchi cu tin daño, logicamente no ta bay traha bon of haci loke e mester haci. E consecuencia ta cu e por lastima un persona.
Bo mester sa kico e klapchi ta haci. Bo mester wak y lesa e etiketa unda ta prescribi kico e ta haci. Si e no tin e informacion ey, libremente bo mester puntra e bendedo di klapchi riba kico e ta haci pa bo sa riba expectativa di e klapchi ta.
Klapchi pa mucha
Un sugerencia importante ta esun di cumpra klapchi adecuado pa e mucha. E ta un tradicion cu e muchanan na Aruba ta lanta den e ambiente aki di tira klapchi, pero ta importante pa educa nan di e manera corecto con pa cende esaki sigur. Tambe ta bon pa papia cu e hobennan, ya cu hopi biaha nan ta gusta experimenta cu klapchi. Ta bon pa nan bay safe riba uzo di klapchi.
Uza semper mecha largo. No cende klapchi cu sigaria of cualkier obheto. No bolbe bek of mishi cu klapchi cu no a cende. Ya cu tin algun di nan cu ta cende mas lihe cu otro. P’esey ta consehabel pa no cende nan bek di biaha, sino laga warda un par di minuut pa bo ta sigur cu berdad el a paga.
Nunca cende klapchi den man, ya cu tin caso di accidente registra cu prome cu e persona ta tire, ya caba el a explota den nan man. Cende nan riba tera. No tira riba otro no, tampoco riba bestia.
Sra. Croes-Maduro a desea henter comunidad di Aruba feliz dianan di fiesta y un aña nobo sigur liber di cualkier accidente cu klapchi.
