Campaña Nacional Contra Abuso Sexual di Mucha “Mi Mesun Heroe” a keda conoci

Diasabra ultimo, Gobierno di Aruba, ministerio di Asuntonan Social y Husticia conhuntamente cu Edselyn Figaroa, a lansa e campaña nacional contra abuso di mucha “Mi Mesun Heroe” cu ta componi pa un buki y serie di television enfoca riba prevencion di abuso di mucha.

Cu e presencia di varios mandatario como su excelencia Sr. gobernador Alfonso Boekhoudt, prome minister Evelyn Wever-Croes, ministernan, parlamentarionan y otro invitadonan a presenta e campaña riba un topico cu pa añanan ta gosa di un atencion hopi grandi y cu debi na e proyecto aki Gobierno di Aruba cu diferente otro instancianan a trece dilanti nan esfuerso pa comunidad, mayornan y muchanan mes cu ta e protagonistanan principal, preveni abuso sexual di mucha.

Prome minister Evelyn Wever-Croes a expresa cu pa Gabinete Wever-Croes I y II e topico aki di abuso di menor y sigur abuso sexual di muchanan ta un topico di prioridad hopi halto, “na Aruba lamentablemente nos ta mira casonan di abuso di menor, abuso sexual cu sin bay den e cifranan mi ta kere cu nos tur ta di acuerdo cu cada caso, un mes, ta di mas, p’esey e compromiso pa cada un, pa nos bringa e abusonan aki”, el a sigura.

Covid-19 ta un pandemia cu a dal Aruba hopi duro y riba tereno di abuso sexual di mucha tambe, “lamentablemente el a empeora e situacion” unda cu tin adultonan cu ta faya, ta p’esey e compromiso di gobierno pa combati e abuso di mucha aki y pa pidi e compromiso di tur adulto na Aruba pa logra combati esaki y ofrece e muchanan e proteccion.

Pa e motibo aki, segun prome minister a declara nan a traha riba diferente aspecto con pa combati e tipo di abuso aki, unda nan a aumenta e castigo na maximo na aña 2020, nan a traha riba loke ta trata cu un delito asina no ta caduca mes lihe cu antes, nan a traha riba un central meldpunt, codigo di proteccion di mucha, entre otronan.

Sinembargo, ora ta mira tur esaki y ainda ta mira cuanto caso ta tuma luga, “berdad, nos mester cambia strategia y esey ta loke nos ta haci awe, empodera e muchanan mes pa nan tambe por yuda protege nan mes, pa nan por sa ki ora nan por bisa si y ki ora no, pa nan por para un desaroyo y busca un hende di confiansa pa bisa kico ta pasando “si nos empodera nan e ora, nos por logra di protege nan mas na tempo”.

Ademas, el a bisa cu na Aruba e gran mayoria di casonan di abuso sexual di menor ta tuma luga door di un abusador cu ta cerca di e famia, sea ta un familiar of amistadnan di e mayornan, “lamentablemente, ni cuanto nos castigonan den ley, ni cuanto meldpunt, ni cuanto codigo nos bin cune, si nos como mayornan no tene miho cuenta cu ken nos ta laga nos yiunan, nos no ta caba cu e abuso aki nunca, pero si nos yiunan siña con pa nan pidi atencion, pa nan bati na porta di adulto, con pa nan bisa no, e ora mi ta sigur cu nos por logra hopi mas”, prome minister a sigura.

Di su parti, minister di Enseñansa Endy Croes a comenta cu e proyecto aki ta fit corectamente den e vision di gobierno y na tin un prioridad hopi halto, na mesun momento nan a acerca como ekipo na prome minister pa asina ey busca e fondonan necesario pa pone e proyecto aki den accion unda e mes a expresa “cu hopi a wordo haci” pero e parti di prevencion y duna e muchanan e hermentnan necesario tabata falta, despues di hopi aña di preparacion nan a lansa e proyecto.

Asina mes, minister di Asuntonan Social y Husticia, Rocco Tjon a trece dilanti cu “combati abuso di mucha ta un tarea di nos tur, no ta un tarea solamente di gobierno, ni di un organisacion, e ta rekeri atencion di nos tur, di tur sector”.

Tambe, el a informa cu Ministerio Publico proximamente lo emiti un maneho nobo pa atende cu casonan di abuso sexual y siman pasa nan a firma un protocol cu European Family Justice Alliance pa asina percura pa e profesionalisacion di full e veld por sigui tuma luga.

Tur e iniciativa aki ta enfoca hopi fuerte riba e proceso y tambe riba e atencion cu mester tin pa e victimanan, sinembargo, ora ta wordo papia di combati abuso di mucha e ta rekeri un atencion continuo.

Tjon tambe a bisa cu e proyecto aki ta enfoca riba prevencion a base di educa e muchanan, educa e comunidad den general riba e problematica aki, den su opinion, akinan ta caminda cu e proyecto “Mi Mesun Heroe” ta diferencia su mes di tur otro iniciativanan cu ta existi caba.

Un proyecto cu a wordo evalua pa diferente profesionalnan, entre nan psicologonan pa asina por ta sigur cu e proyecto aki ta wordo acepta no solamente pa e veld sino cu ta wordo comprendi door di e muchanan y cu lo tuma luga pa por lo menos dos aña cu tambe lo wordo transmiti pa Telearuba den luna di augustus, diferente rednan social y na diferente scolnan, segun Tjon a sigura.

Edselyn Figaroa, ken ta e persona encarga di e idea aki cu alabes ta e coordinador di e proyecto “Mi Mesun Heroe” a splica cu despues di a presenta e proyecto aki pa 16 biaha, el a wordo scucha cu atencion, despues di dies aña canando rond cu e proyecto aki el a gradici minister Tjon, prome minister Evelyn Wever-Croes hunto cu parlamentarionan y organisacionnan pa kere den dje.

Figaroa a señala cu e no ta un victima sino un sobreviviente di abuso di mucha unda cu hopi hende ta desea castigo halto pa e pedofilnan, unda e mes a sigura cu “mi tambe lo a desea cu esun cu a abusa di mi tambe lo ta cera, pero e lo yuda comunidad cu un pedofil menos riba caya, pero pa mi mes e no lo haci nada mas, pero ya mi a wordo marca pa bida, p’esey e ta asina importante pa nos traha riba e parti di prevencion” el a bisa.

Door di e mesun motibo aki e buki “Mi Mesun Heroe” a nace, un curriculum cu e cual Figaroa ta soña pa drenta scolnan di Aruba y tambe e tin e honor di lansa e campaña nacional contra abuso di mucha cu e cantica titula “E ta mi curpa” cu ta forma parti di e serie di 52 episodio y lo ta parti den cuater temporada.

Pa finalisa el a enfatisa riba e frase “Tin solo dos dia den un aña caminda bo no por haci algo, esey ta ayera y mañan p’esey awe ta e dia y e ora pa hunto nos uni y Aruba completo bisa no na abuso di mucha”, el a finalisa.