Serlimar a informa e inicio di nan campaña ‘milieustraat’ cu lo cuminsa diadomingo awo, pa tur cu ta tene limpiesa (awo cu temporada di fin di aña) y kier benta sushi, sea material, cashi, articulonan grandi, por haci uzo di e campaña aki.
Pa diadomingo awo, e team di Serlimar lo ta na Noord, Colegio Felipe B Tromp. Michael Raymond, manager encarga pa recoge desperdicio a duna splicacion riba kico lo pasa for di 24 di november te cu 15 di december proximo.
For di cuminsamento di aña, ‘milieustraat’ ta un proyecto cu Serlimar ‘tin pega na curason’. Nan ta hacie e proyecto pa añanan y pa fin di aña aki lo haci’e mas grandi, pa cada fin di siman, habitante den bario por acerca cu nan desperdicio y benta esaki afo.
E ta un colaboracion cu Serlimar ta ofrece pa comunidad por haci uzo pa cualkier material, sushi, articulo grandi cu nan no lo uza mas, pa benta afo cerca di nan. “Nos tin un team trahando hunto pa haci e campaña aki posibel”, Raymond a splica. Tambe nan a haya fabor di Bureau City Inspector pa tira bista y sigura cu tur cos cana organisa.
Pa persona cu no tin manera pa hiba sushi, of no tin auto cu por transporta esaki, lo tin ayudo di un grupo cu lo bay na e cas di e persona pa asina bay cu e desperdicio y hib’e central, pues ‘nos ta alivia e persona den e parti ey’.
Sinembargo e ta bisa pa cada hende pa yama prome, na 524-5080 pa por schedule e servicio aki pa pasa na cas, tambe pa specifica ki desperdicio lo ta buscando. E regla di tipo di sushi no ta conta pa kimico, asbest of cosnan cu por ta peligroso, sino ‘mas tanto wasmashin, stoof, frishider, cashi, mata, limpiesa rond di cas ta acepta’.
Pa e siman aki nan lo ta na Noord, Colegio Felipe B. Tromp for di 8or di mainta te cu 2or di atardi. “Un tremendo oportunidad pa haci limpiesa y mantencion di e bario. Un servicio extra y sin cu mester paga algo. Nos lo ta na 6 diferente area te cu 15 di december. Pa locual ta otro bario, lo duna anuncio riba Facebook.” Tambe nan lo keda promove te ora cu e temporada caba.
