Ayera e lider di POR y ex minister den e gobierno actual, Otmar Oduber, a bin cu diferente documentonan unda entre otro ta acusa gobierno y locutor/comerciante Leoncita Arends di haci negoshi ilegal cu tereno.

Pa basta aña documentonan ta lek for di Departamento di Infrastructura (DIP) riba e supuestamente corupcion di parti di Leoncita y e minister di Infrastructura Benny Sevinger. Esaki por lesa frecuentemente den corant cu ta sostene e partido oposicion MEP, esta Solo di Pueblo.

Pero ayera e partido POR tambe a pick up e tema aki y a sali den publicidad grandi cu e acusacion na adres di sra. Arends. Nan ta bisa cu a specula cu tereno, esta bende un oposicion riba un tereno pa 600 mil florin, di cual 485 mil florin a bay pa sra. Arends. Esaki a wordo regla por medio di un compania riba nomber di e yiu di sra. Arends. Bon Dia Aruba a puntra lider Oduber si POR lo bay Ministerio Publico (OM) pa haci denuncio tambe. “Nos intencion ta pa informa comunida di abusonan cu a y ta tumando luga. Nos ta para pa integridad den gobernacion y bendemento di tereno di pueblo mester caba. Om lo mester sa si nan ta interesa den e documentonan”, asina su comentario ta.

E documentonan a wordo manda pa prensa y activamente distribui tambe pa Ralph Maduro, doño di e medio Power FM y bon amigo di sr. Oduber. Leoncita Arends mes a reacciona cu nan no mester di gobierno como cu nan tin asina hopi tereno den eigendom pa bende. Banda di esaki el a cuestiona un post di sr. Maduro riba Facebook di un email di parti di prome minister Mike Eman. Den esaki sr. Eman a indica cu sr. Maduro mester keda ‘trankil, Speed y Leoncita a yega na final di careda’. Ta cuestiona si e mail aki ta di berdad y segun Leoncita su comentario, ta pidi pa Veiligheidsdienst investiga pasobra no por cu ta mal uza nomber di prome minister. Banda di esaki e periodista Speed tambe ta hunga un rol activo den e discusion. Manera conoci e periodista y sr. Oduber ya tabata clash cu otro den pasado. Awor e periodista tambe a post cu nos mester keda pendiente di ‘prueba’ cu e tin,  mustrando cu sr. Oduber como minister a comete corupcion. Aunke e periodista no ta menciona su nomber, e contexto cu e ta duna ta mustra cla cu ta trata di sr. Oduber.

Pero te awor e periodista aki tampoco a entrega un keho na Ministerio Publico. Pues te awor tin solamente confirma cu minister Paul Croes ta bou sospecho di corupcion.

Tereno di gobierno
Bon Dia Aruba mes a publica varios biaha riba casonan unda minister Sevinger a aproba e peticionnan pa tereno den un forma asina rapido, cu ta mustra sospechoso. Mientras di otro banda miles di ciudadanonan ta wardando añanan largo riba un pida tereno, otronan ta haya aprobacion den un siman of hasta un dia despues di manda un carta pa minister Sevinger. Mayoria biaha e ta duna su aprobacion, uzando e palabranan : ‘dezerzijds akkoord. Gaarne uw medewerking’, asina instruendo e departamento DIP pa regla e asunto.

Den pasado a puntra e minister con e procedura di otorgamento di tereno ta bay. Segun minister ta DIP cua ta duna e conseho cu e minister ta sigui. Sinembargo ora nos a puntra DIP riba esaki, nan a contesta cu nan ta manda nan consehonan pa bureau di minister pa asina e mandatario tuma un decision. Y nan ta confirma cu ora cierto personanan ta manda carta pa minister, nan lo wordo yuda mas lihe. A base di cua criteria minister ta yuda e personanan aki mas lihe cu nan peticion, no ta conoci cerca DIP.