Mediante un comunicado di prensa Minister Ursell Arends a remarca cu den aña 2024 e campaña di microchipping di mascota. E biaha aki ta enfoca riba microchipping di ambos cacho y pushi, conscientisando doñonan di mascota di e beneficio pa microchip nan mascota.
Microchip ta un obheto micro (chikito) cu tin informacion di mascota y su doño. E chip aki ta wordo inyecta bou di e cuero di un cacho of pushi. E microchip ta hopi chikito y ta wordo pon’i den menos di 2 seconde via un hangua pa un veterinario profesional. Asina cu e mascota tin e microchip e veterinario ta registra tur informacion di rasa, genero, nomber, caracteristica y informacion di e veterinario y doño den un sistema di registracion di mascota central.
Esaki mas cu claro ta beneficioso pa e doño di mascota den caso cu e mascota perde pa cualkier motibo, na momento cu un hende hay’e, por check tur informacion pa contacta e doño ariba e mircochip y por wordo identifica via e microchip reader door di tur veterinario, fundacionnan, KPA, BCI y tambe Centro di Control di Cacho.
Den cuadro di esaki Ministerio di Naturalesa a desaroya un sistema di registracion di mascota yama “Aruba Pet Registry”. Un mascota cu tin su microchip ta wordo automaticamente registra na e sistema central “Aruba Pet Registry”, esaki ta crea un identidad propio pa e mascota.
Doño di mascota por microchip nan cacho of pushi pa un suma relativamente abao, un suma subsidia door di Ministerio di Naturalesa, y por haci un cita na tur veterinario.
Un mascota sea cacho of pushi por biba te cu 15 aña y si e ta bon cuida e por biba hopi mas. Un mascota ta un ser bibo y domestico, esaki ta nifica cu e ta depende 100% di su doño. P’esey ta importante pa e doño di e mascota zorg pa cuminda y awa limpi tur dia, un luga cu sombra pa e mascota sconde for di elementonan natural entre otro: biento, solo y awa, microchip pa e wordo registra oficialmente, sterilisacion pa ambos macho y hembra pa evita cu e ta haya puppies of kittens inespera, cuido medico, vacuna, vitamina, medicamento contra carpata y bichi di curason etc.
“Ban pone como meta e aña aki pa nos bira un isla ehemplar pa asina demostra cu nos ta doñonan responsabel pa nos mascotanan,” Minister Arends a enfatisa.
