Jurette Croes, relacionista publico di Departamento di Salubridad Publico a duna informacion tocante e campaña di Dengue, cu lo cuminsa dialuna awo pa prevencion di criadero di sangura.
E campaña di prevencion ta relaciona cu e temporada di horcan cu ta na caminda. DVG lo ta activo riba rednan social, cu flyer y bannernan. “Un campaña masivo, cu e meta na final ta pa evita cantidad di malesa cu ta wordo transmiti via sangura… Zika, Dengue, Chikungunya.”
Sinembargo, por bisa cu e aña aki e cantidad di criadero a mantene abou. Nan a splica cu aña pasa, e campaña a bay ‘fructifero’, unda cu comunidad a yuda hopi. E cantidad di malesa transmiti pa sangura tabata abou, y ta desea pa mantene asina.
Croes ta bisa cu kier pa comunidad tuma nota di campaña, pero pa nan no spanta, si no sa kico ta pasando. E campaña ta pa alerta comunidad tocante e medidanan cu ta desea pa pueblo tuma, pa asina evita confronta cu epidemia of ‘brote grandi transmiti’.
A tuma nota cu actualmente no ta tende departamento ta papia tocante Dengue, Chikungunya y Zika, no ta existi un epidemia mas? Croes ta contesta cu e sangura, Aedes Aegypti, tin’e. “Unabes nos tin nan, nan no ta sali. Lo haci lo maximo posibel pa evita e sangura sigui bay parti y broei malesa.”
Tambe a bisa cu for di januari te cu juni awasero no a cay, pa es motibo e cantidad di sangura ta abou. E caso ta tiki, sinembargo e team ta pasa cada luna pa controla. Den temporada di yobida e riesgo ta mas grandi
Departamento di GKMB (Gele Koorts en Muskieten Bestrijiding) no por controla tur cas den 6 luna. E ta keda pa comunidad completo yuda contribui pa un temporada sano, pa asina evita criadero y sangura ta bula rond.
Croes ta splica cu ta cuminsa e campaña di conscientisacion unda nan ta duna tips. “Tur aña ta keda mescos. Nos ta bisa hende pa tira awa afo paden y pafo di cas. Controla tur caminda tin artefacto pa evita awa keda pega, of prepara ora awa cuminsa cay. Uza proteccion na porta y bentana. Tambe repelente pa atardi y anochi. Preferibel bisti paña cla y largo pa atardi y anochi.”
Tambe tapa awa cu ta colecta pa uzo domestico cu screen. Si un persona ta malo di keintura, pa evita e wordo pica pa sangura. Croes a bisa esey ta tips pa cuminsa conscientisacion di DVG su plan, ora cu nan cuminsa nota cu caso ta cuminsa subi.
Departamento di GKNB ta sigui cu nan trabou. Nan ta sigui señala cu si tin persona cu malesa, departamento di DBZ hunto cu GKNB ta bay pa haci investigacion y controla bario. Nan ta spuit pa contene e maximo malesa posibel.
A puntra Croes si tin vacuna contra malesa pa protege. El a contesta cu pa Dengue, Zika y Chikungunya no tin vacuna na momento. Manera pa evita ta djis ta keda pa uza repelente frecuente. E sangura Aedes Aegypti gusta e scuridad, ‘pues controla cas cera pa proteha famia y bo mes’.
