“Ban cuida nos muchanan den temporada di Carnaval” ta un campaña di conscientisacion cu minister di Asunto Social, Glenbert Croes y su colega di Husticia, Andin Bikker a introduci oficialmente den cuadro di Carnaval 66, ayera.

Mirando e incidentenan cu a tuma luga apenas cuminsando e temporada di festividad di carnaval, minister Croes a cualifica nan di “inaceptabel y grave” y p’esey nan a dicidi di introduci e campaña aki. E ta un proyecto piloto carga pa full e plataforma di Crisis Plan Social (CPS). Asesor di CPS, Sharisa Tromp a duna un splicacion di e plan aki, caminda e muchanan su proteccion ta keda central.

CPS y husticia.
Di su banda minister Bikker a gradici tur e partnernan social cu hunto cu su ministerio a organisa e reunion diabierna atardi cu el a cualifica como fructifero pa atende e problematica aki.

Nan a analisa diferente aspecto di e problema aki cu e ta considera cu no ta uno nobo, ya cu den diferente carnaval e presencia di muchanan den actividad di carnaval cu tin di haber cu adulto ta ripiti tur aña.

E ta haya cu esaki tin diferente dimension y responsabilidad. Un di nan tin di haci cu e responsabilidad di e mayornan. E ta indica cu e campaña di conscientisacion aki ta recorda e mayornan riba nan propio responsabilidad. Pero na e mesun momento recorda nan cu e mayornan no ta asumi nan responsabilidad pa cu nan yiunan, y si esakinan ta wordo constata, tin instrumento huridico pa actua. E ta spera cu den niun caso mester bay asina leu. P’esey nan a cuminsa cu e parti di conscientisacion.

 

Pero tambe y los di esey, e mandatario a referi riba e responsabilidad cu instancianan di e sector publico y priva ta asumi. Sin desconoce e rol cu departamento di Voogdijraad y tambe di Fundacion Guia Mi tin.

Logicamente, minister Bikker a aclaria, cu a base di constitucion nan tin cu respeta e derecho di libertad cu e mayornan tin pa cria nan yiunan. Pero si e mayornan no ta respeta e normanan basico caminda mester prevalece e bienestar general di e mucha, tin aparato huridico pa actua. Nan ta duna instrumento pa instancianan por actua, entre otro Voogdijraad y fundacion Guia Mi. Pero tambe tin envolvimento di Ministerio Publico (OM) y cuerpo policial (KPA) pa bin cu cierto accion pa salvaguardia cu e criatura of menor di edad su bienestar ta protegi.