Campaña presidencial di Joe Biden a bisa diaranson cu a duna bek un donacion di $2,800 di Louis C.K., un comediante y escritor kende su carera a keda destrui despues cu cinco muhe a acus’e di mal conducta sexual.
E comediante, kende su berdadero nomber ta Louis Szekely, a haci e donacion na Biden dia 4 di maart ultimo, segun record di Comision Federal di Eleccion. A haci e donacion un dia despues cu e victoria comandante di e ex- vicepresidente den mas cu un decena di Super Tuesday a pon’e riba caminda pa bira e presunto nominado Democrata pa enfrenta presidente Donald Trump.
Un vocero di campaña di Biden a bisa desde esey a reembolsa e contribucion, cu lo refleha den su proximo reporte entrega na mei. E vocero a nenga di duna mas comentario.
Szekely no a responde inmediatamente na un email diaranson pidiendo pa comentario, y su publicista tampoco a responde.
The New York Times na 2017 a publica un investigacion den cual cinco muhe, cuatro di ken a papia den record, a detaya mal conducta di e comediante den añanan 1990 y cuminsamento di 2000. Algun di e muhenan a bisa cu abruptamente el a cuminsa masturba dilanti di nan. Un a bisa cu el a pidi pa haci esaki, pero el a rechasa su peticion. Otro a bisa cu e por a deduci cu e tabata masturbando mientras tabata papia riba telefon cune.
Szekely despues a bisa cu nan storianan tabata berdadero y cu e tabata ‘arepenti’ di su actonan, pero e reaccion tabata rapido. FC Networks rapidamente a retir’e di shownan di cual e tabata parti, Netflix a cancela plan di un special di stand-up y e lansamento di su pelicula ‘I Love You, Daddy’ a keda cancela. HBO tambe a elimina su contenido for di su servicio di streaming.
Campañanan presidencial tipicamente ta veto ken ta haci donacion na nan campaña, y regularmente ta debolbe contribucionnan di figuranan cu por presenta un problema.
