Ta su yiunan a convence Parlamentario Independiente Dahne Lejuez sigui den politica. Bon Dia Aruba a acerca e Parlamentario Independiente cu algun pregunta specifico despues cu e mes a anuncia di lo forma parti di e partido politico nobo Accion 21. Esaki particularmente debi cu tabatin hopi speculacion riba su futuro.

Segun Lejuez, kende tabata forma parti di MEP, “despues di a delibera y evalua cuidadosamente cu mi casa y mi yuinan, specialmente riba e impacto pa nos bida familiar, ta hustamente mi yuinan a motivami y convencemi cu ta importante pa mi continua den politica. Esaki pa asina mi por sigui sali na vanguardia di e derechonan di nos ciudadanonan. Particularmente si considera e consequencia cu decisionan tuma pa gobierno y/of parlamento tin riba e bida cotidiano di nos ciudadanonan.”

Locual a atrae na partido Accion 21 ta e hecho cu e ta un partido nobo y no-tradicional, y cu tin su mesun vision. “Conociendo Sr. Miguel Mansur personalmente, y despues di a scucha su ideanan y solucionan pa cu nos pais den e situacion financiero y socio-economico cu nos ta bibando, na unda ta brinda opcionnan realistico y implementabel a corto, medio y largo plazo den cuadro di e Landspakket y tambe SDG’s, mi ta sinti cu esakinan ta cuadra cu mi vision, pero mas cu tur cos, e ta cuadra cu e Aruba cu ami kier wak pa nos hendenan y futuro generacion.”

Accion 21 a bisa bon cla cu su filosofia politico ta uno liberal, y Lejuez a bisa cu e ideologia di un partido liberal ta un politica y filosofia moral cu ta basa riba libertad, aprobacion di esnan cu ta goberna. “Pero e ta tambe uno, unda ta mira un y tur na un forma igual dilanti ley. Pues un ideologia unda derecho nan civil y derechonan humano ta central y sin distincion y unda nos medio ambiente y desaroyo sostenibel ta haña e atencion debido. P’ami esaki ta importante, particularmente pasobra e ta un ideologia cu ta stimula y sostene oportunidadnan igual pa tur cuidadano pa asina nan por alcansa nan maximo potencial sin perhuicio.”

Alternativa basa riba accion

Locual su obhetivo ta, segun su declaracion na Bon Dia Aruba, ta presenta un alternativa politico no-tradicional, unda cu e enfoke lo ta riba saneacion financiero, revitalisacion economico y reforma gubernamental cu ta basa riba merito y no riba patronahe politico. “Pues, un alternativa basa riba accion y no solamente plannan cu ta keda recicla y despues ta warda den lachi sin implementacion.”

Di otro banda, Accion 21 apenas a lanza su mes, y hasta si logra un asiento, pregunta ta con efectivo e partido lo ta pa logra su vision. Particularmente mirando cu partidonan chikito poco biaha ta logra nan propio obhetivonan. RED por ehempel, no a logra cu a pasa e ley di cannabis, cu tabata un di su empeñonan y hasta a bira parti di e programa di Gobernacion. “Esakinan ta hustamente parti di e reforma cu mester tuma lugar, na unda porehempel den Parlamento, un representante por entrega mocion, amienda of peticion sin tin mester firma of sosten di 2 otro miembro. Pa loke ta e parti di gobernacion, aki lo mester concipia un acuerdo di gobernacion cu ta inclui un ‘timeline’ den cual e obhetivonan di e partidonan di coalicion ta keda defini, pa di e forma aki por sigura cu por monitorea progreso y cu ta cumpliendo cu palabracionan hasi.”

Den concept di Lejuez, e mes a siña hopi den e ultimo cuater añanan. Ora ta para pafo di politica, e ta hopi mas facil pa presenta idea y solucion cu ta mustra logico, pero cu lamentablemente e cultura di patronahe y boluntad politico actual ta obsticulisa. “Ta e mesun cultura politico ta pone cu sobrevivencia y continuacion di e partido hopi biaha ta bay prome cu e interes general di e comunidad. Y hustamente pa por logra na kibra e circulo vicioso aki cu nos ta aden pa varios decada, mi a dicidi di alinea mi mes y subi lista di partido Accion 21.

Marisol Lopez Tromp

Tabatin hopi speculacion cu Lejuez lo a uni cu ex Minister Marisol Lopez Tromp. Riba e pregunta aki, Daphne Lejuez tabata hopi cortico: “ No a logra papia cu Sra. Marisol Lopez-tromp tocante e tema specifico aki, pues no ta na altura di su plannan of si e lo keda activo den politica.”

Campaña

Segun Daphne Lejuez, e hecho cu e periodo di campaña a keda adelanta y ta uno cortico no ta problema pa su persona ni e organisacion politico nobo cu e ta forma parti di dje. Realidad ta cu ainda Aruba den pleno pandemia, y ainda tin un percentahe di transmision relativamente halto. Consequentemente, door di tene e temporada di campaña cortico, e ta beneficioso pa comunidad, ya cu asina ta limita e contagionan cu COVID-19. “Pa locual ta por alcansa tur votador, akinan mi ta kere cu nos por beneficia grandemente di tecnologia y unda cu ta posibel tene reunionan virtual of telefonico cu esnan cu tin acceso na tecnologia pa asina tambe purba tene contacto na un minimo.”