Campaña corta na tres luna… Puro casualidad… of?

Gabinete Wever-Croes a pasa pa historia. Si ta bay tin un siguiente gabinete Wever-Croes, esey ta na pueblo pa dicidi dentro di tres luna. E sucedido cu a conduci na retiro di gobierno, riba nan propio iniciativa, ta e situacion cu a surgi dentro di fraccion di partido POR, unda posible delito cometi den o cu fondo di e fundacion di e fraccion, a hiba na accion investigativo di caracter penal di Ministerio Publico. Un accion remarcable pasobra e pregunta por surgi si esaki ta e promer biaha cu gobierno ta expresa falta di confianza den parlamento, en todo caso parti di parlamento, y ta baha… Cu esaki, e partido cu ya a sufri salida di su miembronan mas prominente, a keda reduci na casi nada, tambe pasobra e unico miembro di parlamento cu a keda den e partido, ta presidente di e fundacion di e coalicion, cu ta obheto di e investigacion di Ministerio Publico.

Cu esaki, segun Constitucion nos lo tin eleccion parlamentario dentro di tres luna, poniendo nos na tres luna menos di campaña, cu di mes apenas a cuminza. Esaki claramente no ta na fabor di e partidonan nobo cu no a haci tanto ainda pa presenta nan mes na pueblo, y ta parce mas bien na fabor di e dos partidonan grandi, cu por conta cu un base social tradicional. Con esey ta bay resulta, esey nos ta haya sa na fin di juni, pa mas tarda. No mester di trata di predeci algo di e resultado awor, nos no sa. Loke si nos por sa kico esaki tin como consecuencia pa e trayecto di reforma cu a palabra cu Hulanda. Gobierno di Aruba y Hulanda a caba di firma e acuerdo pa implementacion di e segundo agenda di implementacion cu ta abarca e segundo trimester, te fin di juni. Den e periodo ey ainda tin hopi cos cu ta den fase di preparacion y/o investigacion, pa yega finalmente na e momento unda mester dicidi con ta bay haci cierto cos. Y aki tin un bentaha grandi pa e partido grandi den e difunto coalicion: esun cu bay goberna desde juli 2021 lo mester sinta cu Hulanda pa tuma e decisionnan clave, di manera cu no por usa esaki como arma critico contra e partido den e proximo tres luna. Kico asina ta e cosnan pa cual decision no ta cay dentro di e proximo tres luna?

Por ehemplo e decisionnan clave pa cu e aparato gubernamental y e reformanan necesario pa baha gasto, cu na 2025 mester ta 20% menos cu na 2020. Den e proximo lunanan tin accion di analisis y investigacion, pero decisionnan grandi pa e cuadro legal, etc. ta ser tuma pa mas tempran na januari 2022. Asina tambe e sistema di impuesto, unda ainda ta hunga cu e dos posibilidadnan, di BTW o ABB, y e cambionan cu mester bin pa haci e sistema mas eficaz y eficiente. Lo bay traha tambe riba conexion online di Departamento di Impuesto cu banco, notario, banco di seguro social y fondo di pension, cu banconan como promer prioridad. Asuntonan di mercado laboral y di medida pa mehora ambiente di haci negoshi tampoco lo conoce decision grandi den e proximo lunanan. Tambe e decision si na 2025 nos ta bay pa edad di pension na 66 aña ta keda tuma despues di eleccion.

Esaki riba su mes no ta bisa cu e temanan aki no por ta obheto di debate den e campaña cortico cu nos ta bay haya, pero lo ta e contrincantenan cu lo mester trece nan dilanti, pasobra e partido grandi cu ta den e gabinete demisionario lo move tur cos pa futuro. Esaki ta pone e partidonan ey den desbentaha, pasobra te awor aki nos no a tende tanto di e temanan importante cu ta bay hunga un papel di peso den e proximo añanan. Y esun cu di tur manera ta trece e temanan clave aki dilanti y ta pidi opinion di e electorado, lo mester sa bon kico nan ta propone, pasobra di tur manera nan propuestanan lo mester cuadra cu e tightjacket cu e acuerdo cu Hulanda lo pone pa cualkier cu ta asumi responsabilidad gubernamental den segundo parti di e aña aki. Manera nos a yega di comenta anteriormente, esaki ta pone mas presion riba tur actor politico pa nan bin cu propuesta realistico, sino esey por resulta fatal. Nos no ta mira un situacion surgi unda un partido cu rechazo total di e acuerdo cu Hulanda ta resulta e partido mas grandi, cu e pretension cu ta bay sinta redefini henter e acuerdo cu Hulanda.

Den tur e conmocion di ayera, a keda un pregunta cu nos mester haci nos mes. Esey ta cu nos a mira un ministro di e gabinete bandona barco pasobra e tabata/ta envolvi den un investigacion penal di gran envergadura; gobierno no a cay. Despues ta surgi un conflicto cu un ministro cu tabata pretende di pone un fin na corupcion den su ministerio; gobierno no a cay y a saca e ministro for di gabinete. Awor a bin un investigacion den un fundacion unda un parlamentario por ta envolvi: gobierno a cay. Te awor no mas e palabra integridad a bolbe den nan vocabulario? Tur sucedido ta demasiado casualidad pa nos kere.