Ken ta ofrece mas?!… Continuacion
Den nos ultimo editorial nos a analisa algun di e temanan treci dilanti pa gobierno o oposicion cu bista riba eleccion otro aña. Nos ta observando un ola di oferta, pa gana simpatia di votado. Tur esaki tin su limitenan financiero, pero e consideracion ey no ta bin dilanti. Esun cu hacie, den e caso aki oposicion, ta haya e critica conveniente, cu nan ta ‘contra pueblo’. Di e manera aki ta dificil pa oposicion bisa algo sensato tocante e loke gobierno ta ofrece, pero como medio di comunicacion nos no tin problema pa trata e tema aki.
Un di e temanan principal tabata e pakete di mehoracion pa e personanan cu ta haya asistencia social (bijstand, onderstand). A aumenta e suma basico di bijstand, a aumenta e suma pa cada miembro di famia individual, y a aumenta e suma pa cada yiu cu ta bay scol. Keto bay naturalmente e suma aki no ta yega na e suma calcula cu un famia mester pa sobrevivi, pero ta hopi cerca caba di loke un persona ta haya como salario minimo. Aki ta unda e pregunta ta surgi, cual por cierto a bin dilanti tambe den e debate di presupuesto: nos no ta yegando hopi cerca di e salario minimo actual cu e total cu un famia ta haya? Esaki no ta bay kita incentivo di hende pa bay busca trabao? Nos a tende nos Prome Ministro bisa cu un bos poco timido cu e ta spera cu esaki no significa cu hende no ta bay busca trabao mas, e ta spera cu nan ta sigui haci esey…
Pero, den gobernacion nos no conoce ‘speransa’. Nos conoce ‘control’ riba esnan cu ta ricibi asistencia social y nos tin funcionario publico pa haci esaki! Y ora tin prueba di incumplimento, anto mester conclui cu no tin interes pa traha y mester corta o para e ayudo. Nos no por permiti nos mes pa crea un grupo den comunidad cu no ta traha pero cu gobierno ta mantene nan. Nos ta tende bon noticia di banda di ministro encarga cu trabao y asunto social encuanto e personanan cu a haya trabao ultimamente y cu a sali for di e sistema di ayudo. Nos ta spera cu esey ta asina y cu lo continua cu esaki tambe.
Bisando esey, nos ta bin riba otro aspecto relaciona cu esaki y esey ta e confusion cu tin encuanto salario minimo y e ‘bestaansminimum’. E salario minimo cu actualmente ta na algo mas di Afl. 1667,60 y cu e aumento premira di 2% lo mester bira Afl. 1700 pa luna. Na mes momento e ‘bestaansminimum’, e suma minimo cu un persona mester pa biba riba su mes y mantene su mes, su so, ta na Afl. 2065. Con den practica e personanan cu salario minimo ta haci anto pa ‘make ends meet’? Simpel, compartiendo luga di biba cu otro persona. E hecho ta keda cu su so e persona ey no por paga un apartamento bon, come adecua y percura pa su transporte. Nos no ta papia di auto aki, pero di paga bus tur dia… Esey so caba ta un storia riba su mes.
Igualmente nos tin e caso di e famia ‘modelo’ di mama, tata, y dos yiu, cu mester como minimo Afl. 4336,- pa nan por cera luna. Tur famia tin esey? No, y e situacion ey no lo cambia asina facil tampoco. Nos a tende un miembro di oposicion bisa den parlamento cu loke nos mester haci realmente ta hisa e salario minimo te na Afl. 2500 por ehemplo, pa e trahado individual por mantene su mes na un nivel digno. Por ta cu parlamento ta e escenario propicio pa ventila e tipo di pensamento noble aki, pero e ta keda pega riba e mundo berdadero. No mucho tempo pasa den e mesun corant aki a sali un articulo tocante e salario minimo na Venezuela (US$42) y a haci un comparacion cu Argentina: US$ 430. Aruba ta actualmente na dobel di Argentina: mas di US$ 900! Esey kiermen cu nos ta biba bon? Na prome luga e ta un indicacion con caro Aruba ta pa biba! Y ta di comprende cu ta existi e deseo pa aumenta salario minimo drasticamente, pero kico lo ta e efecto di esey den bida real? Cu dunadonan di trabao ta cuminsa mas tanto posibel baha gasto kitando hende di trabao. Y tambe nos por bira hopi mas caro como destinacion turistico, sin cu nos ta mehora nos servicio, compara cu otro destinacionnan den nos region. Kico nos ta gana cu tur esey? Cu nos ta bira mas caro ainda.
Kico si nos lo por haci pa e ciudadano cu cartera chikito, sin hunga Sinterklaas cu un porciento aki, dos aya? Nos no ta consehero gratis di ningun partido, pero djis dos punto importante: vivienda popular y transporte publico. Mirando e escasez di tereno riba cual nos a comenta recientemente, kico ta ofrece como solucion masivo pa vivienda popular den e proximo 10 aña? Y nos ta keda debe e pensamentonan riba transporte publico te un proximo ocasion…
