Campaña electoral ta den full swing y tur caminda por mira e autonan di e campañadornan ta core rond, cu boroto fuerte y bandera cu ‘no ta crece mas’… Ta parce cu nada a cambia compara cu añanan anterior, y den e fin di siman aki nos por a haya algun ehemplo. Asina autoridadnan policial a bin topa cu un parada/manifestacion riba via publico di e partido grandi den oposicion na San Nicolas, unda a interveni pa pone un paro na esaki. Di otro banda, diabierna atardi tabatin un ‘evento/manifestacion’ o algo por el estilo na Tanki Flip, di e partido grandi den e coalicion demisionario, cu a paralisa trafico pa basta rato y a obliga hopi hende di busca un otro ruta pa nan yega na nan destino. Esey ta doble decepcionante, pasobra su lidernan ta esnan cu a hura nos cu nos mester comporta nos mes den e campaña aki, pa obviamente bira (laga) haci exactamente loke ta taha nos…

Obviamente esaki no ta e comienzo cu nos lo kier mira di e campaña. Nos no a sali ainda di e crisis di Covid-19, y a pesar di e hecho cu un bon parti di nos poblacion ta vacuna caba, esey no ta duna nos e garantia cu den e lunanan cu ta bin ta mehoracion so nos lo mira. Nos tin e ehemplo di Corsou nos dilanti, unda a pesar di e advertencia y reglanan di comportamento cos a bay for di man di forma spectacular; nos no kier yega na esey, nos ta supone.

Banda di e peligro di salud publico cu e tipo di accion aki ta representa, e pregunta ta tambe si e ta asina efectivo. Nos ta scucha critica di ciudadano cu ta puntra nan mes si e partidonan no tin nada otro di haci cu placa cu no ta cumpra bandera y t-shirt. Nos ta den e pandemia ainda y hopi hende en todo caso ta mira e necesidad di cuminza comunica di otro manera cu pueblo. Y di mes caba nos ta mira un gran cantidad di partido chikito a lanta, cu no por competi na e manera tradicional aki, ni cu nan ta desea esey. Sin embargo, desaroyo den otro pais a mustra nos cu e ta posible pa hiba un campaña efectivo sin cu mester di tanto aglomeracion di hende presente na mesun lugar y na mesun ora. Nos ta curioso pa sa kico nos lo bay mira di un manera nobo di campaña y dia di eleccion nos lo haya sa kico a logra of no.

Den tur esey nos a keda cu un pregunta y esey ta: tin un otro manera di pensa cu a surgi durante e periodo di mas di un aña, cu no a caba ainda, entre nos hendenan, cu ta haci cu tin un base pa partidonan cu un programa di cambio gana un pia na tera firme den e par di luna aki di campaña? Nos no ta asina sigur di esey, y nos ta observa cu no tin tanto cambio tampoco den forma di campaña di e dos partidonan grandi, no solamente den accion di campaña riba caya, manera describi ariba, sino tambe den e forma di acerca e fenomeno ‘partido nobo’. Remarcable y tipico tabata e observacion di un cierto partido cu ta cuestiona cu hende hoben sin experiencia lo bay ‘core stage’ den Bestuurskantoor pa nan por haya sa de que se trata, mientras e partido ey cu su tesoro na experiencia lo ta un mihor opcion, den nan vision naturalmente. Ironico ta cu ta trata di emesun partido cu menos cu cuatro aña pasa mester a bandona gobierno, despues di a percura pa e periodo mas desastroso den nos bida (cortico) como pais autonomo, y esey no solamente den sentido financiero, sino tambe den sentido moral, percurando pa un serie di caso hudicial unda mandatarionan ta ser señala como sospechoso principal y como dirigente di un organisacion criminal, un acusacion cu nos no tabata mira den otro casonan den pasado.

Y e problema realmente no ta solamente e hecho cu tabatin obviamente posibilidad pa organisa maldad di e manera aki, pero tambe cu nos no ta mira nada ta cambia, tampoco den e ultimo añanan, salvo cu awor si ta mira un Ministerio Publico mas activo, cu no ta core bisa mesora cu un aparente asunto cu no ta mustra bon ‘ta problema di parlamento, no di nos’. Nos ta contento cu esey, pero nos tin e leve impresion cu esey tin tur cos di haci cu e hecho cu Hulanda ta harta di e situacion aki y ta pone e medionan disponible pa por actua. Pero, esaki no ta suficiente. Nos problema no ta solamente cu awendia nos por haya nos cu mandatario cu no sa kico ta su propiedad y kico no, pero cu nos tin henter un aparato gubernamental cu ta carece grandemente di e control cu supuestamente mester ta ‘normal’ pa ningun hende hinca man den caha. Y ta aki nos no ta mira cambio, tampoco den ultimo cuatro aña. Ki dia nos ta cuminza tende politico papia di pone orden den e aparato publico? Of mester mantene un ‘level playing field’ den esaki tambe, pa por keda haci ‘business as usual?