Diadomingo, 2 di april, ta e fecha cu campamento a cuminsa oficialmente na Aruba e aña aki y ta finalisa dia 16 di april, unda comunidad tin e oportunidad di pone tentnan y trailer riba e beachnan cumpliendo cu tur regla y normanan estableci.
Temporada di campamento, ta e unico momento den aña cu Arubiano por scapa di su rutina y por disfruta di dianan di vakantie, unda den dianan aki ta demostra e hermandad cu ta existi pa comunidad bin hunto y disfruta di e beachnan di Aruba, semper cu e responsabilidad pa cuida naturalesa, pa mantene e beachnan limpi y no haci algo cu por causa un daño na e luga.
Bon Dia Aruba a consulta cu un campado—di cual su nomber lo keda anonimo, unda el a menciona cu e ta considera campamento algo importante tambe pa turismo y pa e desaroyo economico di Aruba cu na e momentonan aki mester tene na cuenta cune, mirando e pasonan di recuperacion economico cu ta tumando luga na Aruba despues di e pandemia.
“Nos ta organisa hopi bon. Nunca nos a haya un reclamo of un boet pa algo. Nos ta mantene e area limpi y nos ta busca nos luga pa pone e bañonan, unda nos ta bay cushina y asina ey nos ta mantene nos luga pa e tempo aki. Tambe turistanan ta bin pa comparti cu nos; te hasta nan a yega di come pisca fresco cu nos a yega di prepara. Nan ta gosa di e tradicion aki unda cu nos ta espera cu esey lo por continua e aña aki, pa asina yuda nos turismo y economia”, el a finalisa.
Den un comunicado di prensa, Cuerpo di Polis a informa tocante e condicionnan cu esnan cu ta pidi permiso mester tene na cuenta, unda cu despues di campamento tur obheto mester wordo kita for di beachnan. Si esaki no ta sosode polis lo kita esakinan riba gasto di e campado.
Yamada ta bay na un y tur pa mantene e beachnan limpi, deposita tur desperdicio den bari di sushi of den saconan di plastic y un bon comportacion, pa asina pasa un bon temporada di campamento sin ningun problema.
Extra condicionnan cu a wordo añadi na e permisonan ta lo siguiente:
1. Ariba e santo blanco di e beachnan bao ningun circunstancia ta wordo permiti pa haci B.B.Q., na otro parti solamente por haci B.B.Q. cu B.B.Q. pit di gas.
2. Tent y trailernan cu ta wordo usa pa campa mester ta den bon condicion. Nan mester wordo poni a lo menos 10 meter di e oriya di lama y nan mester wordo poni por lo menos 5 meter for di e caminda publico. No cumpli cu e regla aki, polis lo kita nan.
3. Bao ningun forma ta wordo permiti pa reserva tereno pa campamento.
4. Tent, trailer y otro obhetonan cu ta wordo usa pa campa no por wordo poni riba otro luganan cu ta e luganan cu ta destina pa esakinan y cual luganan a wordo destina pa Gobierno.
5. Den e tentnan/trailernan mester tin suficiente recursonan pa loke ta trata dunamento di prome auxilio. (E.H.B.O.)
6. Ta prohibi pa pone na tent/trailer, obhetonan of plachinan cu no ta cuadra cu moralidad.
Pa mas informacion tocante mas condicionnan por bishita e Facebook page di KPA Aruba.
