Vakantie grandi ta den porta loke kiermen cu pa un periodo largo e muchanan lo ta na cas disfrutando di nan vakantie.
Hopi mayor ta scoge e opcion di vakantie camp pa nan yiunan disfruta lo mas cu por nan vakantie, y di otro banda tin mayornan cu ta scoge pa e muchanan pasa nan vakantie na cas. Dem ambos caso, ta importante pa tene algun recomendacion den mente. Fundacion Respeta Mi tin algun punto clave pa mayornan tene cuenta cune ora di tuma decisionnan importante pa actividadnan di vakantie grandi.
E aña aki por a tuma nota cu tin varios camp cu ta organisando actividadnan pa muchanan durante e vakantie grandi. Esaki di un banda ta algo hopi bon pasobra e muchanan tin algo di haci durante vakantie, pero pa ta hopi importante cu esaki ta sucede na un manera mas sigur cu ta posibel pa e mucha.
Fundacion Respeta Mi ta conseha mayornan na momento di busca un camp, mirando cu aworaki tin hopi variacion cu diferente tipo di actividadnan, pa haci algun pregunta na e dirigentenan di e campnan cu kizas mayornan no ta para keto na dje.
Un punto di importancia ta cu e camp mester ta relaciona cu cosnan cu e mucha gusta haci, cosnan cu e mayor sa e mucha tin interes den dje. Pero tambe e seguridad fisico y emocional di un mucha durante e camp ta hopi importante
Pesey mayornan por puntra algun pregunta na e dirigentenan di e campnan manera por ehempel cuanto lider ta bay tey presente durante e campamento, cuanto mucha ta bay tey presente pa cada actividad, cuanto mucha cada lider lo ta responsabel pe, ki medidanan di seguridad lo tin durante e actividadnan entre otro. Preguntanan cu kizas ta simpel cu mayornan no ta para keto riba dje, pero un lider so no por wak pa hopi mucha y pesey ta importante pa tene cuenta cu e tipo di preguntanan aki. E parti di supervision ta hopi importante.
E parti di sacamento di potret di e muchanan ta punto cu den actualidad ta di suma importancia. Fundacion Respeta Mi ta remarca cu hopi biaha ora nan duna charla na scolnana tocante e topico aki, tin hopi mucha ta indica cu nan no ta gusta pa nan saca nan potret of grabanan y esey ta bin back na e cultura di consentimento cu ta hopi importante cu ta yuda preveni abuso di mucha.
Pero e ta importante tambe pa crea un ambiente mas sigur pa e muchanan crece aden pa asina hasta ora nan bira adulto nan tin esaki presente y ta respeta opinion di otro, ta respeta necesidadnan di otro, loke otro kier si of no. Pesey nan ta enfatisa cu mester puntra e muchanan kico nan kier, si nan kier sali den potret si of no.
Di otro banda tin muchanan cu ta keda cas tambe durante vakantie y hopi biaha, mayoria di e mayornan tin cu traha y no tur ora nan por keda cu e muchanan. Pero semper mester percura cu tin un persona di confiansa cu e muchanan na cas y cu e mucha por keda cu un hende cu e ta confia.
E parti di laga e mucha cu un persona di confiansa ta uno hopi delicado ya cu e ta relacion cu e tema di prevencion di abuso di mucha pasobra segun stadisticanan casi un 90% di casonan di abusonan sexual ta wordo cometi pa un persona cu e muchanan conoce. E por ta famia, personanan cu e mucha concoce, bisinja amistadnan di cas entre otro. Dus ta hopi importante pa e mayornan tin esey den mente ora di dicidi ken ta e persona di confiansa cu lo wak pa e mucha.
Algun señal cu mester ta alerta riba dje ta si e mucha duna cualkier indicacion cu e no kier bay cerca cierto persona. Den casonan asina ta sumamente importante pa bay controla y haci pregunta pakico e mucha no kier bay cerca e persona aki. Specialmente si e ta cambio repentino, si e mucha tabata gusta bay cerca e persona, pero di ripiente di un pa otro e no kier bay eynan mas.
E punto aki ta relaciona back na e un aspecto hopi importante, comunicacion. Hopi biaha mayornan no ta conciente cu ta hopi importante pa semper tin un momento pa comunica y conecta cu e mucha. No ta importante e cantidad di tempo, pero e calidad di tempo. E por ta 15 minuut cualquier ora di dia, pero ta importante pa e mayor tin un momento di calidad, sin distraccion, sin telefon y conectra ariba loke e mucha ta papia y kico e ta express y kico su necesidadnan ta emocionalmente.
