Ayera den oranan di madruga nos isla a haya un bon yobida cu lamper y strena cu a haci cu coriente a bay den algun bario di Aruba. Ademas por a mira inundacion na casi tur caminda.
Manera nos lectornan por aprecia riba e potret di referencia asina a manece e rotonde nobo di Noord cu a DOW a habri dos dia pasa e cual banda di dje tabatin awa, tera y buraconan cu cada biaha cu awa ta yobe ta causa molestia pa e chauffeurnan y daño pa nan autonan mes.
Igualmente a pasa na otro caminda di Noord, cu pa hopi tempo caba e asfalt a bira pio, como tambe ora awa ta cay ta inunda y lo trece como consecuencia molestia pa turistanan cu dia pa dia ta pasa riba e caminda aki ya sea canando of cu auto.
Na Cumana tambe por a observa un inundacion grandi.
Rooi Manonchi a crece y mata di kwihi a cay .
Tambe Rooi Manonchi, un biaha mas ta wordo menciona den e temporada di yobida cu a cuminsa.
E cantidad di awa cu a cay a haci cu Rooi Manonchi a bolbe haya bida. El a crece di tal forma cu no tur auto por pasa eybanda. Ademas e tera a bira moli cu a haci cu un mata di kwihi grandi a cay, loke a blokia definitivamente e trafico pa un par di ora den e caminda aki cu ta comunica cu Yanani y San Barbola.
Trahadonan na servicio di DOW cu ta traha cant’i caminda a presenta na e sitio pa asina traha riba e mata di kwihi aki. E mata aki cu a kenter, nan a kap pida pida loke a produci alrededor di 10 baki di pickup full yen.
Segun Departamento Meteorologico Aruba (DMA) un cantidad di 17.8 millimeter di awa nan a registra cu a cay den e ultimo 24 ora banda di mainta. Actualmente tin hopi humedad den atmosfera cu ta pronostica cu nos lo sigui haya un par di awasero mas.
